當年今日
關於我們

【李八方online】大輝幫理大分校搵地 鎖定東莞、廣州、深圳

蘋果日報 2019/01/25 16:54

廣州深圳林鄭月娥東莞林大輝理工大學李八方ONLINE大灣區

前立法會議員林大輝上個月獲特首林鄭月娥委任,成為自己母校理大嘅校董會主席。任重道遠嘅大輝不敢怠慢,已經好積極咁諗緊幫理大分校嘅「搵地大計」,不過塊地唔喺香港,而係放眼大灣區。咁梗係啦,大輝係全國政協委員喎,係咪要政治正確先?
林鄭上個月中先委任大輝做理大校董會主席,今日佢提早同傳媒食團年飯,自不然講起呢份新工嘅大計。對母校充滿感情嘅大輝話,理大好多科目都有得做,好似酒店管理、物理治療、應用科技等,就以酒店管理為例,尖沙咀有間酒店係理大嘅教學研究酒店,成績相當唔錯,啲房成日爆滿,佢都想為其他科目做到類似咁嘅配套,問題係香港冇地。
於是佢決定向北望,鎖定東莞、廣州同深圳3個大灣區城市,睇吓可以喺邊度搵到500至1,000畝面積嘅地做理大分校,佢仲打算過埋農曆年就上去同3個市嘅政府傾添。
獲委任做理大主席,但唔代表大輝事事認同林鄭。最近政府派錢出晒事,大輝都慨嘆政府派咗3次錢,次次都搞到畀人鬧,真係失敗。八方就問佢,有乜理由派咗3次都吸收唔到經驗,點解可以搞到一鑊粥?大輝聽到即刻話,3次派錢都係唔同時期嘅政府派,如果林鄭連任,就要吸取到今次嘅教訓。咁都兜到,好嘢!差啲唔記得咗,大輝係林鄭競選特首時嘅競選辦主席團成員嚟㗎!