由3月開始，有八、九成時間得極少數股份強勢撐住港股，只有一、兩成時間全線股份咁升，即使今日似乎升得幾全面，之後都要有心理準備，戰線可能好快收窄，所以，只要升市不死，龍頭強股繼續坐住就冇死，無謂太傷神。

上一期話煤炭、銅鋁股有轉強迹象，江銅（358）、中鋁（2600）應該開始進入大漲小回格局，同樣值得坐。水泥股的確弱雞少少，今日就得安徽海螺（914）特別強，H股升3%唔算異常標青，滙控漲幅6%都已經係佢一個Double，但趨勢上已見轉強，加上明顯跑贏同業先係重點，可以博佢係水泥股龍頭，後市只升佢一隻。

安徽海螺受惠內地水泥價格上漲，首季純利增長86%，每股盈利人民幣40.632分，而彭博綜合分析員預測第二季每股盈利73分，不過，市場普遍看淡第三季淡季表現，預料每股盈利回落至46分，可見目前市場對於未來海螺的期望不大，但目前內房市場火爆嘅情況下，只要水泥市場有驚喜，就成為海螺股價上升催化劑，預測2017年市盈率11.3倍，確實唔算貴，係遠比中建材（3323）穩健嘅選擇，執行能力亦遠比雄安概念嘅金隅（2009）為出色。

海螺美中不足之處，係H股對A股輕微溢價2%。今日海螺A股爆升5%，H股升3%，反而A股都醞釀破頂，有興趣不妨買A股600585。

晉佳

掌握財經生活資訊，即Like「蘋果ATM」fb專頁啦！
http://fb.com/appledailyatm