羅貫峰曾經喺無綫同港視做藝人，40歲嘅佢，同圈外太太Leona早已育有兩子，分別喺4歲同2歲。但羅貫峰一直恨追多個女，前日太太順產誕下重7磅多嘅孻女，母女平安。囡囡叫羅心研，羅貫峰話：「希望佢好似字面咁，用心去研究人生每一樣嘢。」
有女萬事足嘅羅貫峰，前日喺Instagram貼相大騷囡囡得意樣，噚日喺電話中難掩興奮心情：「本來真係生兩個夠晒數，但人哋話囡囡係前世情人，好想試吓有囡囡滋味，睇吓佢係咪咁嗲。如果再生仔就真係收工。」太太剛陀B時，夫妻都有壓力，知道係囡囡當然開心，佢話：「好彩唔係男、女、男咁排，唔係『嬲』字。」

臍帶似膠喉

原來今次係羅貫峰首次剪臍帶，佢解釋：「大哥哥出世時，臍帶纏頸；二仔時，我接通知趕到醫院，佢都出咗世，到妹妹呢次我唔走，入去產房一陣就剪到，感覺好得意，嗰條臍帶好似冷氣去水膠喉，我剪咗八、九吓先剪到。」羅貫峰自從約滿港視後，專注打理食肆及照顧家庭，佢位於深水埗嘅食店過時過節都會免費派飯同送福袋，佢話：「我哋食客主要係街坊同香港人。」
撰文：馮仁昭