【彈珠競速】連尼加都睇唔停 彈珠競速爆紅多得武肺
蘋果日報 2020/06/15 22:32
連尼加彈珠彈珠競速Jelle Bakker
講起彈珠嘅遊戲，你會諗起咩？波子棋？彈珠台？甚至係進化到手機遊戲嘅《怪物彈珠》？呢啲通通都outdate啦！
荷蘭YouTuber Jelle Bakker有個channel Jelle’s Marble Runs，專係分享各類彈珠影片為主題，尤其以彈珠競速為主。自16年起，Jelle主力創作一系列同模仿現實體育賽事的彈珠賽事影片，好似模仿奧運、舊稱「彈珠奧運」(MarbleLympics)嘅彈珠聯賽(Marble League)；另外仲有Jelle喺屋企附近沙丘親自挖賽道嘅彈珠拉力賽(Marble Rally)。每項賽事將每位彈珠選手與隊伍擬人化，並迅速形成了粉絲文化
Jelle搞各項仿現實體育賽事嘅彈珠競速至今四年，搞得有聲有色，包括進行團體募資，訂閱最高等級的贊助人將可以選擇一顆自己喜歡的彈珠，出現在影片內的VIP觀眾席上作為自己的象徵，而且亦有一系列相關周邊商品。
喺年頭Jelle再製作新系列彈珠賽事「彈珠F1」(Marbula One)，而咁啱撞正武漢肺炎肆虐，令大部份體育活動延期或取消下，多得英國足球名宿連尼加喺twitter轉發佢嘅彈珠拉力賽影片︰「估唔到我可以睇晒成條片，睇嚟戒唔甩冇比賽睇嘅日子。」多得連尼加加持，就造就咗Jelle嘅channel竄紅。佢嘅影片喺twitter上突破3,000萬views，仲得到時代雜誌、CNN等多家媒體嘅採訪。
Jelle爆紅後獲得電動方程式車隊遠見維珍車隊(Envision Virgin Racing)賞識邀請合作，再搞個全新系列「彈珠FE」(Marbula E)，以取代被取消的電動方程式賽事，喺原定FE賽日舉行賽事。好似上個禮拜六就舉行咗印尼雅加達站，Jelle YouTube上嘅影片至今已經超過100萬views，你都咪話唔巴閉！
創作人Jelle Bakker
多得連尼加曾喺3月中體壇停擺時出tweet間接宣傳，Jelle頻道其後爆紅。