立法會主席范太做埋呢幾個月就拜拜，港島區幾名女將爭位，佢置身事外隔岸觀火，因為8月初就會上京欣賞奧運，直到月底先返香港，佢話9月7號會投票，不過拉票助選咪預佢，因為佢啲支持者屬游離票，搵佢站台都過唔到票。范太真係老實，左派票源由中聯辦分配，唔到佢指揮話事。

北京奧運開幕禮同熱門賽事一票難求，范太話曾經問過小霍攞飛，對方冇回音，後來有人叫佢填表，范太大包圍乜項目都話想睇，最終獲配跳水同羽毛球賽門票。范太話睇運動員由高空插落水「幾得意」，民望長年居首嘅佢，睇住其他高官、議員民望大插水，唔知有冇同樣感覺？
江湖傳聞范太係火炬手，佢噚日話不能證實，對於梁振英撻朵係火炬手，佢笑言應該唔算洩露國家機密，但透露準火炬手同奧組委有默契不能多口，不過「疑似特首候選人」有言論自由，佢要講旁人冇得封佢口。
卸任主席後，范太話會專心做好人大常委，暫無意做香港重要公職，亦唔會長居北京。至於下任主席人選，唔到佢欽點，但認為主席必須熟悉議事規則，處事公平公正。