關楚耀、Soler同埋林曉培噚晚喺九龍灣StarHall舉行音樂會,翻唱多首熱爆hit歌,關楚耀即場唱契爺譚詠麟嘅《一首歌一個故事》孝敬媽咪,仲送多一句「我愛你」,因為佢話唔知下次幾時先有機會再上台唱歌。仲有Soler嘅Dino玩爆褲鏈,搵咗兩個扣針扣住,喺台上面刻意用結他遮遮掩掩,但係咁樣仲唔自然。
Dino做咩爆褲鏈?完騷後,佢解釋話:「上台前先發現,係前面,但係其他褲又襯唔番個造型,所以用兩個扣針扣住,令我同觀眾都安全啲。」關楚耀就暗笑話:「佢係勁到爆!」Dino就尷尷尬尬咁話:「我係開心到爆。條褲著咗全日,係去廁所之後拉唔番,我已經將個結他不停放前面。」
Dino又話3歲大嘅仔同老婆都有嚟捧場,3歲大仔仲睇足全場冇瞓覺,佢話:「出世時成日band房睇我唱歌,間中會同仔仔合唱,又即興一齊作歌。o氹佢瞓覺會一齊唱歌,依家作咗兩首兒歌。」
林曉培話自己最近忙寫書,寫一本關於佢撞車傷人導致焦慮症嘅書,佢話:「我的生活已經是一個超真人騷了,平時生活上很多東西都要克服,目前最困難是寫書,因為要整理時很恐佈,會令皮崩很緊,書寫一個關於焦慮症,因為自己生病好過來之後又復發,因此令到自己很好奇,希望將呢個故事很坦白咁跟大家分享自己病況和分享當時影響傷害的人,這是一個很殘酷的真人騷。」