吳浩康日前到海港城花了千多元,買聖誕禮物給同事及家人,包括送給老闆楊受成的CD架、送給經理人霍汶希(Mani)的垃圾鏟。
垃圾鏟贈經理人
吳浩康說:「我希望送CD架畀老闆,第時可以放晒我嘅CD喺上面。而送畀Mani嘅垃圾鏟都有意思㗎,希望我做錯事時,佢攞嚟拍我個頭,唔好用垃圾鏟鏟走我。至於個結他月曆,係送畀我嘅結他老師。」
吳浩康又買了一個水壺給喜愛晨運的父親,他說:「雖然我𠵱家唔係搵好多,只可以買份小禮物送畀身邊嘅人,阿爸都成日同我講,做好自己已經係送畀佢嘅最大禮物。」
吳浩康表示對藏毒事件感到愧疚,並自知要好好珍惜目前擁有,他更警惕自己聖誕期間不要外蒲。
攝高枕頭諗清楚
吳浩康說:「聖誕節最多都係同公司同事食飯,一定唔會四圍蒲,始終瓜田李下,人哋以為我重未知衰㗎!」
吳浩康自言今年發生太多不光彩的事,他說:「經過呢件事,我真係攝高枕頭諗清楚,大家肯畀機會我重新嚟過,我以後會努力做好,○五年一定唔會令大家失望。」
採訪:卓美娟
攝影:何國豪
場地:海港城ClubX、LCX
服裝:ARMANIEXCHANGE