《導火新聞線》今晚播出第二集，呢套劇以新聞工作者為主題，叙述咗香港報館編採人員搵料生涯及與時間﹑新聞搏鬥嘅血淚史，王宗堯喺劇中演爛笪笪哩啡記者，勁麻甩﹗

喺播出兩集中，王宗堯同歡喜冤家楊淇，為咗一單豪門爭產案而放蛇，佢哋換上夜蒲戰衣，向一名同富二代有路嘅男子索料，但事敗被發現，楊淇遭追打，好彩宗堯英雄救美，佢靈機一觸攬實楊淇去後巷扮依泣而避過一劫。

至於飾演報館總編輯嘅梁小冰，為搵料不擇手段，劇中講佢獨行獨段臨時抽起頭版，呢啲情節都惹網民熱議；另外，劇中一幕楊淇被炸彈狂徒鄭藩生擄走，鄭藩生兩度爆粗，亦引起網民爭議。

對於種種爭議，王宗堯說：「話套劇爆粗，其實電視空間係有監管，當初大家拍嘅時候係唔知劇集會喺網上播定係其他平台播出，大家只係好想反映現實，咁記者或者朋友之間好多時候都會講粗口，多少少呢啲元素，只要唔係太刻意，反而會更加生活化；至於放蛇，可能好多人以為係差人做，事實係記者為咗攞一單好爆嘅料，好多時身陷險景放蛇，所以都好睇到日常記者係做啲乜嘢。」

另外，據知港視喺本周六，會喺將軍澳某大型商場為《導》舉行宣傳活動，過往港視未有試過為劇集在商場舉行活動，今次實屬首次，可見對此劇極為重視。