周中「盃仔」有唔少強弱懸殊戲碼，舒夫真高、沙維奧拿呢啲喺聯賽冇表現嘅名牌前鋒乘機發圍數糊，惟獨AC米蘭嘅奧利華拉繼續食白果。眼見球隊半場先輸兩球反勝布雷西亞4:2，開個31倍「客/主」，偏偏冇佢功勞，連身價同佢差天共地嘅波里路都省入兩粒。老友，醜啲啩？

離場被噓前途似「咁」

呢場波AC排出哥斯達古達（40歲）、卡富（36歲）、費華利（34歲）同埋邦利拿（25歲），組成加埋有135歲嘅防線，可惜條防線「大」而無當，半場先輸兩粒。不過，布雷西亞去得咁盡，迫虎跳牆整醒隻睡老虎……。
奧利華拉喺59分鐘被換離場，球迷噓聲四起，成為7年嚟首位被噓嘅AC米蘭7號仔（你幾時見舒夫真高俾自己球迷主場球迷噓過？）；好戲在後頭，AC嘅大逆轉就喺佢離場1分鐘後開始，由布洛治、恩沙基各入1球，而波里路省入兩粒反勝。
如果唔係今次大逆轉，AC教練安察洛堤可能已經冇得撈，提早讓位俾盛傳繼位者納比都未定。今次「肥安」靠波里路同老將恩沙基救亡，奧利華拉咩功勞都冇，恐怕「肥安」對佢嘅印象分，唔會剩番幾多啦。
「或者係感同身受，舒夫真高早排為自己繼承人奧利華拉講過好說話，但奧利華拉自己唔爭氣就天王老子都幫你唔到。佢下一次正選機會，可能係次回合再對布雷西亞。」