天水圍嘉湖山莊近期樓價急挫之際，有人便打算趁低吸納，搏後市反彈。居住在麗湖居的徐先生表示，如今樓價已跌至其心目中入市的水平，計劃短期內買入一個實用550餘呎、樓價約500萬至550萬元的細3房單位作投資用。

他說：「本身之前有儲錢的習慣，每月儲蓄1.1萬，我覺得個市跌，又符合到個經濟能力，咪開始考慮下入貨，好多人都話下年有排跌，美國又加息，結果係咁升升升，我又無水晶球，唔需要太算死草，去到一個比較合理價錢就可以入市。」而且他深信香港樓市會反彈，「我覺得未來係會升返，係一個經濟周期底下，只要你捱得過呢個低谷，就算佢跌，跌一排， 10幾年後又咪升返，你又咪係賺返錢。」

其實他一直都有留意樓市動向，坦言曾錯失多次入市機會，「之前就係猶疑咗太多，錯過太多機會，之前有啲價再平啲，不過果陣時未儲到咁多錢，所以無買到。」他透露，自己本身從事空運文員月入約2萬元，自計劃置業後，便開始節儉，甚至放棄「養車」，「以前都有玩(車)，但覺得唔太值得去玩，就會無再揸車，儲錢就儲多咗。」

記者:葉煜燊

investMAN
For People of Style & Substance
掌握理財智慧 感受生活品味
http://facebook.com/investMAN.hk