各位球迷，為咗擁護心愛嘅球隊，你哋可以去到幾盡？除咗每場必睇、場場買佢贏，呢兩位燥底阿叔，仲喺馬會正式「開波」，即係打架咁解，其中一人仲打到爆缸，見晒紅，真係夠晒應節。

話說前日跑夜馬，讀者周先生喺下晝5點左右，去到葵芳馬會，用入錢機入錢，雖然當時仲未開跑，但已經有唔少馬迷喺度刨緊馬經，做定功課，突然間周先生聽到有人爭執嘅聲音，轉下頭就畀人群推咗埋一邊，搞咩呀？原來係兩位年紀唔細嘅阿叔即場「開波」，其中一位高大啲嘅，着住印有某英超球會logo嘅外套，另一位矮啲嘅仲衫都除埋，「佢哋本身討論緊場波，講講吓，矮嗰個就問候對方老母，俾人鬧嘅咪開佢波囉！」

由周生提供嘅片段見到，高大叔瞓咗喺地上，光豬阿叔就捉實佢隻右腳唔放，兩名馬會職員，仲有幾位馬迷喺旁邊苦苦相勸，光豬阿叔之後冷靜落嚟放手，抹一抹臉上嘅血，起返身嘅高大叔不甘示弱，不停挑機「出嚟吖，打完唔使講嘢！」企喺旁邊嘅花生友都加入討論「X人老母係唔啱嘅！」谷住道氣嘅高大叔，再發功，一拳打向着返衫嘅光豬阿叔，令佢向後退咗幾步，好彩有人扶住先冇跌落地，打得興起嘅高大叔梗係乘勝追擊，不停出拳，可憐對方因為身形輸蝕，節節敗退，周生話成個過程持續咗差不多十分鐘，直至警察到場先停戰「兩個人都唔細，唔知係咪輸波心情唔好，但真係好無謂！」

警方回應指，兩名分別姓孫（54歲）及姓盧（64歲）男子，因金錢問題爭執及打架，警員到場時，涉嫌打人嘅姓盧男子一度逃離現場，後被警員截獲，兩人皆受傷需送院，警方將案件列作「打架案」，並將兩名男子拘捕。