《儍女》李逸朗(Don)今日都有參加10K賽事，呢幾日可以話係創下佢入行以來人氣最高峰，佢話今次係佢首次參加香港嘅馬拉松賽事，估計50分鐘左右完成，因為平時跑15K都係咁上下時間。

Don又話今次參加賽事唔算辛苦，但就未必會參加半馬，因為自問唔屬於長跑肌肉型選手，只希望可33歲生日前完成一次馬拉松賽事。咁頭先跑嗰陣多唔多人認得你？Don話:「都有少少，仲有啲奇怪目光望住我。我都好佩服有啲人，一路跑得咁快，一路仲可以拎手機影身邊嘅人。」

咁既然有人認得你，有冇人同你一齊唱《儍女》？Don話:「好可惜冇喎!之前有諗過如果有人同我一齊唱嘅話，就可以變成一種加速劑，令我可以跑得快啲，但最後都係以正常速度完成賽事。」

講到話網上各種評論，Don就表示有睇，又話音樂方面嘅嘢，係用番佢喺音樂方面學到嘅嘢去做:「好多人留言俾防止自殺會同醫生嘅電話俾我，唔需要喇，我有相熟醫生喇。希望遲下喺音樂方面仲有機會同大家見面。」

至於0靚妹李綺雯今日都有跑10K，佢估計自己嘅時間係一小時零三分鐘左右。佢話今年起步方向係近大廈唔係近海，冇上年咁辛苦；又謂今日比較潮濕，對全馬選手係較辛苦，但對佢本人就有優勢，因為佢氣管敏感，如果潮濕啲就跑得舒服啲。

此外，伍家謙今年都有參賽，佢喺FB寫道:「最近太忙，今屆無乜時間凖備，要超越上次嘅48分鐘睇怕無乜可能......盡力而為好了，希望一粒鐘內完成啦！各位加油！」