由Sandara、CL、朴春、敏智組成嘅韓國女團2NE1，於2009年出道立即爆紅，但朴春於2014年捲入運毒案後，組合人氣急跌，最終於去年解散，而敏智就係第一個離開舊東家YG事務所嘅成員。

敏智之後加盟新公司，繼續其歌手生涯，而敏智近日接受美國《Billboard》訪問時，就自爆早於16歲已經患上抑鬱症。敏智表示：「我12歲加入YG事務所，15歲就出道，可以話係冇正常嘅童年，所以亦因為咁，完全影響咗我嘅社交能力，我唔識咩係社交，因為每一步都被公司安排得好好，童年回憶只有喺公司接受訓練嘅日子。」

敏智又指因為冇靚樣，所以出道後經常被網民批評：「當時好多人都話我哋醜樣，我唔知點適應，所以只能一直壓抑，但因為係公眾人物，只能表現出不以為然嘅態度。當時年紀太細，只能試下學其他成員，同成熟嘅心態去面對，但真係好辛苦。」敏智續指因為種種壓力，最終喺16歲患上抑鬱症，嚴重到甚至想自殺。

敏智坦言：「每當離開舞台、返到酒店時，就會覺得好空虛，唔知自己人生嘅意義喺邊，所以決定退出組合，思考自己真係想要啲咩。」提到2NE1嘅隊友，敏智表示：「所有一齊嘅回憶都係好溫暖，大家都係宅女，會聚埋一齊睇電視。不過之後各有各忙，一見面就講工作，漸漸變得疏遠。」

男團SHINee成員鐘鉉亦受抑鬱症困擾，可惜於去年自殺離世，敏智就表示：「見到佢就諗起過去嘅自己，亦理解佢點解會揀呢種方式結束生命，所以我現時好想畀年輕偶像知道，了解自己真正想做、想要嘅嘢係更重要。」

精選韓流，喺晒《娛果》
http://fb.com/appledailyent