本報豪情版噚日告別讀者，有政界人士同八方大嘆好欷歔，不過佢先申報利益，話唔係豪情版嘅忠實讀者，只係記起當年豪情版內嘅「肥龍」、「骨精強」廣為人知；回歸前班立法局議員就拎呢兩個名，同當時做財經事務司嘅許仕仁、保安司嘅黎慶寧（Peter）開玩笑，話許仕仁身形似足肥龍，瘦猛猛嘅黎彼得就好襯骨精強呢個名。
據知許仕仁對呢個外號十分受落，俾人叫肥龍叫足十幾年，黎彼得就唔多鍾意做骨精強，之後冇人夠膽咁叫佢。呢對官場肥龍同骨精強退休後各有發展，肥龍重返政府，官至政務司司長；骨精強就淡出政圈。但點估到肥龍最後會惹上官非？世事無常，點會唔令人欷歔？