搵食啫！犯法呀？就係犯法！艾辛同卡頓高爾兩位前英超球星前排加盟印尼球會萬隆，但最近被踢爆佢哋連工作證都冇。據外電話，印尼當局已經禁止佢哋為萬隆比賽，而英國《太陽報》仲話，艾辛同卡頓高爾兩個違反印尼嘅出入境條例，若果被追究起上嚟，最高可以被判監5年！

由印尼政府支持嘅組織「專業體育經理人」調查艾辛同埋卡頓高爾嘅轉會，發現佢哋冇交齊文件註冊，未有印尼嘅工作證就落場踢波。印尼移民當局喺星期二話，佢哋強烈警告萬隆，艾辛同卡頓高爾一日未得到勞工部發出嘅工作證，都唔准比賽。萬隆都認衰，話喺上周末印尼聯賽開「咧」戰，艾辛同埋卡頓高爾都喺未申請到工作證之下為球會上陣。雖然萬隆知道做漏嘢，但佢哋就玩卸責，話足總同賽會都准呢兩位前英超球星披甲。萬隆主帥莫捷達就話：「艾辛同卡頓高爾嚟到，係對印尼一件大好事，佢哋都想幫助我哋國家嘅足球喺世界揚名。所有人都知艾辛係個世界級球員，而唔係非法移民。」