《玉蒲團》係中國著名嘅情色古典小說，喺90年代，麥當雄同蕭若元以呢套小說做藍本，開拍咗部三級片《玉蒲團之偷情寶鑑》，卡士仲好強勁，搵咗吳啟華、鄭則士、徐錦江、葉子楣、周弘、村上麗奈、吳家麗等人演出，故事講述吳啟華飾演嘅未央生生性風流，佢想搞人哋老婆但係又唔想戴綠帽，所以搵咗出身於家教好嚴嘅葉子楣做老婆，之後仲走移植馬嘅器官增強性能力，喺遊學途中搞咗徐錦江嘅老婆，吳啟華遇到一對姊妹花，過住啲荒淫生活！

結果徐錦江為咗報復，走去搞葉子楣，跟住仲將大咗肚嘅葉子楣賣入青樓，做咗名妓嘅葉子楣喺青樓重遇吳啟華，結果喺冇面見人嘅情況下自殺死咗！最後啟華同徐錦江大徹大悟，走咗做和尚。嗰陣因為有唔少劇情浮誇兼荒誕奇淫，徐錦江演繹咗好多性愛招式、吳啟華亦玩咗好多性愛工具、周弘同村上麗奈嘅女同志性愛場面，再加上波霸葉子楣同徐錦江喺大木桶三點不露嘅演出，竟然大收近兩千萬票房，開創咗拍三級片嘅熱潮。

之後到咗《玉蒲團之玉女心經》，今次搵咗李麗珍同埋舒淇擔正，當時舒淇喺香港仲未有人識，演出方面當然瞓身喇！故事係講飾演西門堅嘅徐錦江因為鍾意人妻，本來想幫智障嘅兒子娶老婆，點知見到舒淇之後，竟然想娶佢做妾侍，但係實情舒淇係魔女幻姬化身，最後將西門堅、佢個仔同埋其他妾侍殺掉，李麗珍仲同陰陽同體嘅舒淇舒淇上演一場鬥法！但係有啲over咗就會冇吸引力，呢個《玉蒲團》系列嘅電影，大大話開拍咗超過10部，劇情一部比一部薄弱，已經變得冇吸引力！