香港人即使手機不離手，但總會遇到手殘的時候，一個不慎跣手就跌爆mon了。然而十之八九都懶得去換，但如果上門呢？又或者隨你約地點維修呢？今年28歲的Cicero專做上門手機維修，不論爆mon、換電池或入水都難不到他。每次出動都拖着一喼工具，無論上門還是在公眾地方維修都已經習以為常，Cicero自信地表示：「現時換mon只需約13分鐘就完成。」每日Cicero約接10張單，客人源源不絕，連藝人陳貝兒也是他的熟客。

採訪當日， 客人約了Cicero在又一城的foodcourt維修手機，當記者問他在這樣的環境工作會否影響專注度，他笑說再嚴峻的環境都試過，「我試過喺公園及酒吧整手機，酒吧燈光暗，惟有叫客人幫我拎住電筒嚟照明。」在訪問途中，他把握每一分每一秒，口不停手也不停，一邊回答記者問題，一邊進行換mon工序，不消一會便說：「搞掂了！」完美示範一心二用無難度。

Cicero會修理Samsung、LG、華為及iPhone等機種， 他指客人多於1至2天前與他預約時間，然後他再安排當天的工作行程。「我每次出job都會帶晒所有品牌及型號嘅mon、底殼及電話相機等零件，以備不時之需。工具以螺絲批為主，但Samsung機嘅mon與iPhone唔同，係用膠水及膠紙固定，喺換mon時需要先熔解，所以我會帶埋風筒及火機。」

陳見兒都幫襯
Cicero表示有8成客人都找他換mon，藝人陳見兒也是他的熟客，找他換過幾次mon；其次是更換電池及入水等問題，每次收費由$550至$1,980不等，視乎損壞程度而定。雖然收費與市價差不多，但能上門維修更具效率及方便到客人，加上Cicero每次都會細心詢問，故吸引不少客人幫襯。「有時客人WhatsApp預約話要換mon，但我會問清楚型號及部機有冇反應，因為有時唔只爆mon ，有機會係爆埋液晶體，所以我要問清楚，先可以準備相關嘅零件。」

Cicero自言每次換mon都只需約13分鐘，但回想初初接觸手機維修時，他需要30分鐘才換完mon，更不時弄壞零件及引至手機短路，「整過先知，原來螺絲批會影響電壓，之後就多加留意。」

與朋友夾份創業
Cicero入行約3年，中五畢業後，他便從事電訊及電腦業，「當時我做電腦售貨員，仲學埋整電腦及砌機，覺得維修電腦都幾有趣。」兩年前，從事手機維修的朋友邀請他於天水圍開手機電腦維修店，本想創業的Cicero在抱着不妨試試的心態下答應。同時，他亦向朋友學習手機維修的技巧，「手機維修同電腦好唔同，因為零件相對細件又脆弱，大力少少都會爛，尤其係iPhone7個Home掣。Home掣係一部機配一個，一爛咗部機就要報廢。我用咗幾個月時間去拿揑力度及角度。」

遇有困難時，Cicero便會請教經驗豐富的老師傅，漸漸從錯誤中領略到樂趣，「現在我鍾意整手機多過電腦，因為十幾分鐘整好一部，會有多啲成功感。」因地鋪限制了跨區客源，同時對Cicero來說比較困身，加上與拍檔意見不合，而有拆夥的打算。「上年有位做上門維修雪櫃洗衣機嘅朋友搵我整電話，佢聽我呻嘅同時，提議話手機都可以試吓做上門維修，咪可以唔使俾間鋪限制。」他覺得是一個好嘗試，便於16年8月自立門戶。

整壞電話要賠錢
首次到鋪外維修手機，難免有點緊張，Cicero表示初初常有出錯，更試過弄壞客人的電話，「嗰次係去客人工作嘅化妝專櫃度維修，因為期間好多人經過，客人又要向其他人介紹產品，我有一刻分心聽佢哋講乜，就搞到部手機燒咗，最後我向客人道賺及賠咗$6,000畀佢買新機。好多嘢真係實戰先會知，嗰次之後，我就慢慢訓練自己要專注啲。」

走訪不同地點，對Cicero來說很有新鮮感，「試過去半山3層嘅豪宅，屋裏面有彈床，真係大到嚇死人！又試過去好偏遠嘅地方，好似大埔啲小村，搭的士來回都要一個鐘。」雖然Cicero的服務範圍覆蓋港九新界，但自此之後，他指太偏遠的地方要加的士錢，或待客人出市區時才再約時間。

頭半年生意差
然而，Cicero指頭半年的生意不太好，每日只有1至兩張單，即使計自己的人工只有約1萬，也蝕了8萬多，「要諗辦法宣傳，我有用易拉架及買google關鍵字，初初『爆mon』呢個字冇乜人買，我就試吓有冇用，點知真係有人search，現升到要$26一個click。」此外，他亦有在facebook宣傳，但最大的效用都是靠口碑，「我好着重自己嘅服務質素，不時都會同客人傾偈，會教佢哋一啲貼士，好似點樣分辨真假mon。」真誠的服務態度，令客人很樂意推介他給身邊的朋友。

Cicero每日約做11至12張單，月賺約4萬。「喺3個月前，我請咗1個全職及兩個兼職幫手，除咗幫手接單外，仲會上內地華強北路採購零件。我哋唔會用淘寶貨，因為質素太參差，上內地有得試實物，會搵到啲好檔次嘅零件。」他希望日後可以推出上門手機維修應用程序，令接單更有效率。

搵好工，即上 http://www.ecjobs.com.hk