第26屆金曲獎頒獎典禮今晚登場，喺紅地毯上面，可以見到陳奕迅、張學友同莫文蔚，莫文蔚著咗一條綠色長裙，影相嘅時候，佢仲轉個圈，令到條裙飄起，優雅又活潑。

紅地毯完咗之後，金曲獎頒獎典禮正式開始，哈林一個人做主持兼開場表演，由場外一路唱到入場，一口氣演唱《不散，不見》、《尋人啟事》、《你給我聽好》、《喜劇之王》、《鞋子特大號》、《用餘生去愛》等入圍歌曲，演唱到《PLAY呸》時，蔡依林仲上台同哈林熱舞，炒熱現場氣氛。

之後頒完台語專輯、台語男女歌手3大獎﹐Eason就獻唱《八號風球》組曲，佢同現場18人組成嘅「BigBand」合作，演繹90年代香港歌手26首經典歌曲，包括劉德華《忘情水》、郭富城《對你愛不完》、草蜢《寶貝對不起》、梁詠琪《短髮》、黎明《今夜你會不會來》等歌曲，佢不時喺舞台上奔跑，又大騒轉音等歌唱技巧。