新加坡國父李光耀過世,喺網上見到唔少港人推崇李光耀,原因只係新加坡有「組屋」,同香港比,價錢平,間屋又大。呢種言論,好不幸,證實咗李光耀嘅「亞洲價值觀」係正確,或者話,喺亞洲有好大市場。
李光耀嘅所謂「亞洲價值觀」,其實係「亞洲人冇價值觀」。亞洲人只需要給予飽肚、求生,就會安安份份過埋下半世。即使生活質素改善,所謂提升咗嘅需求只會係賺錢、居住、升遷、消費,其他都唔重要,甚至連語言都只可以做經濟發達國家附庸,例如英語或華語,只能做一個有用嘅工具。
組屋係新加坡成套「維穩工具」之一,係「亞洲人冇價值觀」嘅產物,因為新加坡政府想人民安安份份,所以起啲樓畀你供,忙供樓唔好搞事。收入又扣起你四成做「強積金」(該國稱為中央公積金,無香港咁老實),等你連經濟自由都要剝削,見唔對路移民都冇咁易。當然,仲有強制兵役,你冇份,下一代總會有份。
就算「我討厭政治」,只係講搵食,新加坡做生意,做得好,自自然然會有國家同你爭生意,唔能夠做大。幾優生學都好,政府只想你做個打工仔。呢啲當然係文字上面睇唔到。如果你擁抱組屋,同時有必要接受背後全套「冇價值觀」。
好香港年輕一輩經常話,新一代唔再追求物質,要追求理想價值;亦都開口埋口唔做「樓奴」,唔會買樓,並且指責有物業嘅人係樓奴港豬。
偏偏一講新加坡,同一班人突然間又會對組屋讚不絕口,又話人哋屋大,又話可以安居樂業。呢種人一係太天真,食得自助餐多,以為可以淨係揀組屋,而其他維穩政策可以唔食;一係,呢種人就係佢哋口中嘅港豬,所有祟高理想口號只係手段,一間公屋先係目的。上述兩種人,同樣都係港豬。
新加坡組屋係一面「港豬照妖鏡」,香港人每讚一次,就係對「李光耀理論」嘅最大致敬,同時亦都係加入港豬部隊嘅宣言。
高明
神奇‧頂級‧超卓,盡在偶像派財演高明Facebook專頁:
https://www.facebook.com/BigRiceTea