剛剛宣佈陀B三個月的陳爽，前晚出席電影《蜘蛛俠2：決戰電魔》在尖沙嘴舉行的首映，升了cup的陳爽，腳踏三吋高踭鞋，認真一步一驚心，問到有否得到老公的批准？她笑說：「問過醫生，着一兩小時都可以，不過我老公有叫我小心，大家見我孭手袋，隨身帶備人字拖，去到戲院換人字拖，女仔始終貪靚。」
提到懷孕狀況，陳爽說：「好感恩，狀態非常好，嚟緊停工作，家人想我多啲休息。」至於今年會怎樣慶祝母親節？她說：「出年先同BB慶祝，今年搵老公先，𠵱家老公好細心，諗煲乜嘢湯，同埋叫我食維他命丸，好Sweet。」

激凸顯尷尬

文詠珊（JM）和黃美棋等人亦有出席首映，她們看到一個穿蜘蛛俠服裝的男模，表現興奮，但蜘蛛俠的造型太激凸，搞到JM影合照時，有點尷尬兼目不斜視！JM說：「我冇睇，我唔敢望，通常着呢啲衫比較貼身，容易有尷尬情況，但我就俾佢上身吸引住。」
再問JM會否選擇肌肉男做男友？她則說：「唔需要大隻，但都可以高大，高自己一個頭有安全感，不過我都會以性格取勝。」JM稱她反而接受不到另一半有鼻鼾，笑問要有深入關係先知？JM未有正面回答，只說：「都唔係，但同班女性朋友坐埋一齊傾，大家最接受唔到係有鼻鼾，不過𠵱家醫學昌明，有方法解決。」
採訪：馬建華
攝影：陳志嵐