哈,原來唔只咁少嘢喎,我車報員早兩日收到風,話代理已經將Facelifted新款Mazda5運咗嚟香港,而且仲會喺今日進駐佢哋個灣仔Showroom。雖然新車喺外觀上嘅改動唔係太多,主要集中喺鬼面罩、尾燈同埋新款16吋合金胎軨,但睇落明顯比以前醒目得多。至於車廂方面,新車改用咗杏色做主要色調,兼且加埋中後排冷氣出風口,明顯改善咗乘車環境。另外座椅亦換咗由真皮鑲嵌嘅款式,方便乘客上落嘅電動遙控雙趟門亦得到保留。機械配搭方面,新車仍以2.0公升直4MZR引擎作核心,但由於加有S-VT技術,令動力輸出數值分別為145匹同18.6kgm,就連波箱亦變咗做最新嘅5前速半自動款式,令起步加速表現更強之外,亦有助減低耗油量。聽聞新車嘅售價由$159,990起,有興趣嘅車迷可以佢哋嘅灣仔Showroom睇吓喎!
記者:車報員
查詢:萬事得汽車(28931112)