上個月係上市公司公佈業績嘅高峯期，唔單止華華忙到氣咳，一眾財經公關更係財色兼「失」。華華唔係講大咗，皆因一日幾十間公司一齊公佈業績，為咗搶記者去自己搞嘅記者會，一眾公關靚女自然做到花容失色。至於何解失財？請聽華華道來。
事緣香港乃係出名購物天堂，加上用人民幣喺香港買嘢，等同自動有折扣，當然吸引內地同胞在港消費。單睇尖沙嘴廣東道LV、Gucci、Dior門口長期有人龍，就知佢哋幾咁支持香港零售業。
華華聽聞，有啲上市公司高管，趁住嚟香港開業績記者會兼見吓分析員、芬佬之便，順道shopping購物。面對各式名牌，唔覺意使多咗，難免！財經公關個個都係醒字派，見老總帶唔夠現金，自然出手襄助代為刷卡。