《萬千星輝頒獎典禮2017》將於明年1月21日舉行，雖然喺呢個月初已經公佈男、女主角同男、女配角嘅提名名單(新聞連結： http://bit.ly/2kwyfQL )，但係仲有其他獎項未公佈，所以今日喺電視城舉行記者會，公佈埋其餘嗰啲。

點解要分開兩日做？要問無綫喎！

上次就有好多藝人幫馬國明嘅《降魔的》拉票，不過喺今次嘅記者會，場面似乎比較冷清，只係入咗行已經好多年嘅楊明，竟然有份提名「飛躍進步男藝員」，搞到佢上台拉票嘅時候，一臉尷尬咁自稱做「老屎忽」兼話：「咁多年都係飛躍男藝員，我都一把年紀，不過都好開心，證明公司覺得我仲好後生，仲有進步嘅空間。」

去年楊明已經喺無綫《星和無綫電視大獎》頒獎禮上，同李佳芯分別奪得「TVB飛躍進步男、女藝人獎」；2015年同朱千雪分別獲得《TVB馬來西亞星光薈萃頒獎禮》「最喜愛TVB飛躍進步男女藝員」；2011年、2014同2015年，楊明都提名萬千星輝頒獎典禮「飛躍進步男藝員」。

楊明真係一直在Flying。

有份提名飛躍進步女藝員嘅湯洛雯話：「好開心，我記得五年前啱啱入行，拍完第一套劇有啲唔好評價，之後有前輩安慰話做得唔好唔緊要，最緊要係有進步，o依家提名，對自己有交代。」

王浩信分別同張振朗、唐詩詠提名「最受歡迎電視拍檔」，胡定欣同胡說八道嘅好姊妹一齊被提名，胡蓓蔚話好想拎呢個獎，唔知幾知可以再提名。

更多娛聞，喺晒《娛果》
http://fb.com/appledailyent