曾志偉囝囝曾國祥(Derek)今年憑電影《七月與安生》角逐多個電影獎項，一對女主角仲雙雙贏得台灣金馬獎最佳女主角，Derek做導演真係可以話係威盡。Derek事業得意，愛情方面又點呢？佢同拍拖多年嘅女友王敏奕感情穩定，早幾日兩口子仲去咗買家居用品，同買餸返屋企玩煮飯仔o添！

日前下晏接近5點，Derek同女友王敏奕去到銅鑼灣時代廣場地庫間city'super行街shopping。佢哋帶住情侶太陽眼鏡一齊行到去超市嘅家品部，佢哋對廚房用品非常留意，單係研究裝調味料啲樽都討論超過10分鐘。之後去揀煎pan嗰陣，兩人仲表現得非常纏綿，敏奕仲依偎喺男友身上，Derek就攬住女友條腰，非常之咁有夫妻feel！睇嚟佢哋都好鍾意喺屋企玩煮飯仔，對廚房用品特別注重咁噃！其間有唔少途人見到Derek都認得佢。之後佢哋仲去咗食物部買咗啲沙律菜後就埋單離開，成個購物過程前後花咗足足40分鐘，絕對係精挑細選。

講到當日買咗咁多廚房用品，近日忙於電影《飛虎極戰》嘅王敏奕以WhatsApp回覆《蘋果》話：「自己不嬲都鐘意食住家飯，就算開工都會早一晚或者早啲起身，準備定嘢食，開工可以帶飯或者沙律食。健康啲同埋開工地方未必有咁多蔬菜提供。」除咗整畀自己食之外，佢仲話不時同男友玩煮飯仔︰「平時有時間都會同男友喺屋企一齊煮嘢食，因為比較健康。佢乜嘢都鍾意食，唔會揀擇。」

講到煮飯王敏奕仲自言有一手：「煮飯嘅時候男朋友都有幫下手嘅。同埋煮嘅過程好開心、買嘢又好開心，食完又可以坐係屋企傾偈，唔使畀人趕。」又啱喎！不過都要有地方住先得o架！