成千年前嘅《莊子˙徐無鬼》話「夫為天下者，亦奚以異乎牧馬者哉？亦去其害馬者而已矣」，亦係成語「害群之馬」嘅出處。故事講述黃帝問牧童治理國家之道，牧童就話治理國家同看守馬群差唔多，就係將危害馬群嘅馬趕出去就得。成千年後嘅今日，估唔到都有新演繹。

「天祿是無辜的」

八方之前寫疑勾結鄉黑嘅建制派執葉律師何君堯隻馬「天祿」噚晚出戰跑馬地，網民不過話想去捧何君堯場，但何執葉有幾惹火唔使講，馬會亦如臨大敵，盛傳有勸何律師隻馬自己退，但有人唔肯，結果馬會索性取消晒一整晚嘅賽事，馬迷自然不滿。fb專頁「矇豬部落」亦發帖抽水，「一隻馬可以令到今晚所有賽事取消，搞到其他馬都無得跑，究竟呢隻係咩馬？」解曰：害群之馬……

何君堯威力真係厲害，憑一己之力唔單止拉低咗議會質素，連佢養嘅馬都可以令堂堂馬會取消晒一整晚嘅賽事，果真非同凡響，但亦有網民話「天祿是無辜的」，要怪怪何君堯！