【人紅變輕佻?】傅恆十問九唔答 許凱拒收Fans禮物
傅恆輕佻延禧攻略許凱
年僅23歲、喺《延禧攻略》中飾演傅恆嘅小鮮肉許凱,今晚6點半由上海飛到香港,現場接機嘅fans比吳謹言多,有成30幾人,大部份都係女fans。
帶住黑超嘅許凱,比起劇中嘅傅恆略見圓潤,佢喺6點半現身,不過同劇中情深嘅佢有啲唔同,許凱態度顯得有啲輕佻,fans送禮物俾佢,佢全部唔收;啲fans用國語叫佢望一望,佢有望同笑,但好公式化咁。
輪到記者想同佢傾幾句,但工作人員就示意許凱唔接受訪問,同蘇青及吳謹言親民態度好唔同。記者問佢係咪第一次嚟香港,佢搖頭;再問佢係咪同緋聞女友白鹿拍拖,許凱就冇回應。
而許凱離開機場後,架車就直駛至下塌酒店,不過佢冇落車,佢架車兜咗一個圈後再返酒店,傅恆戴住個口罩落車,有fans嗌佢個名,不過佢都冇應。
精選娛聞,喺晒《娛果》
http://fb.com/appledailyent
傅恆大人嘅座駕兜咗個圈,再返酒店,傅恆多咗個口罩。(攝影:徐錦池、吳耀輝、黃曉程)