網上流傳一段城巴同途人爭路嘅片段,引起網民熱烈討論。片中所見上星期五(13日)朝早11點幾,一架城巴左轉入筲箕灣阿公岩道路口嗰陣,咁啱有個身穿黃衫嘅阿叔擔住把遮過馬路,佢行到路中心,城巴車長即時砵佢,但就冇收慢車速;阿叔亦毫無懼色,繼續施施然過馬路。結果城巴右邊車頭碰到阿叔把遮,城巴車長即刻停車,並爆粗與阿叔罵戰。
車長望向企喺路邊嘅黃衫阿叔大鬧:「X你呀!」阿叔即時還口:「人企喺度你就要停,我行咗先我就佔用路面!」車長唔同意駁斥,兩人嘅指罵聲重叠,只聽到阿叔話「唔係你劈住彎就可以」,車長即時反駁:「我冇劈住彎呀,我同你講!」阿叔指住馬路:「你唔係劈住彎?我行咗出嚟𠵱度。」此時另一名「塘邊鶴」阿叔亦同聲同氣鬧車長:「你仲要畀油你就唔啱啦!」車長怒極回罵:「邊有呀,X街!」