全港現有610間社企，百花齊放。社企民間高峰會將迎接10周年，今年主題為「創變‧未來」，今日舉行啟動禮。主席容蔡美碧（Rebecca）同八方講，今時今日搞社企扶貧助弱，唔能夠再墨守成規，擅用科技開拓唔同階層，例如有社企用App替基層學童補習，甚至仿傚外國眾籌，都值得香港借鏡。佢仲話，推動社企創新，就要改變政策研究新思維。

主禮嘅民政事務局局長劉江華聽見可能有新啟發，皆因近日申訴專員公署揭發，康文署胡亂棄置大量被注銷嘅書籍。佢今日就借機呼籲，公共圖書館好多舊書唔要，無論邊類型社企，咖啡室或種有機菜（嗱嗱嗱，唔好問八方點解......），都可以問康文署「攞書」，搞番個crossover小型圖書館。有幾大成效八方唔敢講，但都好過將舊書當作廢紙棄掉。

同場亦請嚟騰訊公益慈善基金會執行秘書長竇瑞剛分享，近年騰訊透過互聯網，特別係手機通訊平台，推動公益事業，好似剛過去嘅9.9公益日就籌到8.8億元人民幣捐款，惠澤社群。今年社企民間高峰會11月5日至10日舉行，逾30項活動包括一連兩日共18場國際研究會，亦會走入社區舉辦社企市集和導賞等，預計4,000人次參與。