趁住年尾，八方諗住盤點一下行會成員嘅利益申報，點知一個唔覺意，發現有人曳曳喇，喺中美貿易戰打到如火如荼嘅時候，竟然買樓，仲要係買美帝同日本嘅樓嚟放租。睇返行會內一眾官守與非官守成員嘅利申，大部份人都冇乜特別，之但係其中有一位，就喺上個月22日新增申報，指自己分別用本地公司同埋海外公司嘅名義，持有一個日本及美國嘅寓所作為放租之用。咁即係拎嚟投資啦，咁點解唔喺偉大祖國嘅大灣區投資呢？如果係都要喺外國投資嘅話，點解又唔投資喺一帶一路嘅國家呢？

與夫持有三個港物業

講起一帶一路，呢位行會成員亦申報佢喺上個月中加入咗幾個組織，包括出任一帶一路高峯論壇榮譽顧問，仲有中國金融四十人論壇嘅學術顧問，咁睇落都算幾乖，但同時佢又加入成為美國會成員以及香港－－歐洲商務委員會成員喎，唔擔心令人感覺食兩家茶禮咩？

到底呢位行會成員係邊位？之咪就係史美倫。又咁講吖，史美倫身為香港呢個國際金融中心嘅港交所主席，喺幫助國家發展嘅同時投資海外，都係相當合情合理嘅，因為香港係國際城市吖嘛……唔好意思，漏咗個「仲」字，香港仲係國際城市吖嘛。而除咗新增呢兩個海外放租單位，史美倫仲繼續申報同配偶持有兩個南區物業自住，以及配偶以海外公司名義持有離島區一間獨立屋作自住用途，行會中都算富貴族。