韓國年度盛事《MBC演技大賞》噚晚喺首爾上岩洞MBC電視台舉行，大會頒發多個獎項，當中最高榮譽大獎最終由出道16年嘅池晟獲得，池晟今年憑《愛上哪個我》而人氣急升，佢喺劇中一人分飾七種性格，演技備受讚賞，除了得最高榮譽大獎外，池晟亦同時獲得迷你劇部門男子最優秀演技賞、十大明星賞以及同《愛上哪個我》嘅男拍檔朴瑞俊得最佳情侶賞。

池晟獲大獎後喺台上發言：「覺得呢獎係畀創作《愛上哪個我》所有人嘅獎，想對現在應該很開心嘅粉絲講一聲謝謝。好感謝一齊拍攝了《秘密》同《愛上哪個我》兩部作品嘅黃靜茵，我覺得我哋係真心相通，能一齊拍戲好幸福

至於同樣得多個獎嘅《愛上哪個我》、《她很漂亮》女主角黃靜茵，得獎後佢喺台上發言：「我係唔了解劇本就冇法演繹嘅危險演員，但係導演畀了我一個多小時嘅時間去理解，真係好感謝，謝謝一直和我一起苦惱嘅演技老師，謝謝公司家人、代表、謝謝父母，2015年感覺會成為無法忘記嘅一年。」

而池晟同朴瑞俊以男男配憑《愛上哪個我》得最佳情侶獎，佢哋上台攞獎時仲來個深情擁抱，池晟話：「雖然無語但好榮幸，感謝大家喜愛我哋呢對情侶，心情特別好。」朴瑞俊亦話：「完全冇諗過自己同瑤拉（池晟劇中變成女學生嘅名字）嘅羅曼史，感覺劇本正往奇怪嘅方向發展...真係非常感謝各位畀我哋拿到這麼有意義嘅獎項。」

另外，噚晚三台都有頒獎禮，當中以MBC收視成績最好，上半部有12.8%收視，下半部有14.7%收視，雖然比去年收視跌咗少少，但仍然成為噚晚嘅收視冠軍。而《SBS演藝大賞》上半部有9.2%收視，下半部收視有9.5%，排同時段第二位。《KBS歌謠大祝祭》上半部有9.5%，下半部有6.7%收視，收視墊底。