當年今日

馮仁昭四圍超
錢嘉樂恨生仔 3年內娶盈盈 - 馮仁昭

蘋果日報 2012/01/11 00:00


錢嘉樂同湯盈盈拍拖4年,最近阮兆祥踢爆話佢哋5月結婚,噚日嘉樂仔同伍允龍出席《功夫傳奇》節目主持李嘉喺尖沙嘴開嘅「東方體育會」開幕活動時,就解釋係一場誤會,佢話呢排好多圈中人結婚,通常記者都會問結婚話題,阮兆祥就獻計教盈盈答5月,不過未知邊一年嘅5月,點知講完5月,之後嗰句「唔知邊一年」大家聽唔到。
empty
錢嘉樂現身梗係被追問同湯盈盈嘅婚訊,佢即刻露出四萬笑容。
empty
早前湯盈盈傳婚訊,點知嘉樂仔一味拖,盈盈又要再等吓喇!資料圖片
empty
伍允龍(左)同嘉樂仔噚日一齊出席好友李嘉(右)嘅體育會開幕。
「希望三年抱兩」
咁究竟嘉樂同盈盈幾時拉埋天窗?嘉樂起初仲推三推四,話今年洪天明結婚,唔好搶天明風頭,不過追問多兩句,佢就話:「婚一定會結,但今年太多工作,等做晒手頭上工作先。」做埋今年工作咪即係2013年結婚?嘉樂忽然認真咁話:「3年內啦!唔想太倉促,我都大個仔,今年46歲,盈盈細我10年,我亦都鍾意小朋友,希望三年抱兩,不過我係咁講啫!仲要佢肯至得,而且我哋未正式plan過結婚。」
另外,伍允龍同緋聞女友鍾嘉欣之前影嘅親密照曝光,講起呢件事佢大耍太極:「保持私穩,希望大家專注我嘅工作。」