學生Ｙ讀完中四升中五，英文成績唔錯，父母從俗，送佢去英國參加英語遊學團，希望學生Ｙ去完返嚟之後，增加自信心，加強獨立能力，講英文更流利，出年考會考之時，考Oral都會考得好啲吖。
學生Ｙ好唔想去，鍾意留在香港放暑假，打機睇漫畫，幾咁輕鬆吖。但在老不情願情況之下，七月中被送往機場。當日出發之英國英語遊學團，多到數唔清，學生Ｙ之一團有近三十人，大部份係女生，男生唔夠十個。學生Ｙ嘅媽咪話：「唉，啲女生非常活躍，滿面信心。幾個男生就好怕羞，拖住媽咪爸爸，驚死走失，你話香港啲男仔幾落後吖，睇吓阿Ｙ去到英國會變成點！」

學生Ｙ去咗三個禮拜，八月第一個禮拜返到嚟，咦，唔同咗喎，飲茶之時，居然肯食一啲以前佢從來唔肯碰嘅蔬菜類食物，唔通餓得滯？講起英國homestay（居於英國家庭）生活，更滔滔不絕㖭。學生Ｙ媽咪講：「去嗰陣要推佢上飛機，原來佢哋離開倫敦回港之時，成班人好唔想走！」學生Ｙ回到家中第一晚，竟然瞓唔着，話唔捨得喺英國與其他國籍學生（丹麥、瑞典、西班牙等）共同生活上課嘅情況，好期待明年再去外國參加英語夏令營。
睇落學生Ｙ用咗父母兩萬幾銀，物有所值：（一）個人獨立咗；（二）唔再偏食；（三）識得洗浴缸（英國家居條件之一）；（四）講英文講得更好；（五）視野不再限於打機、漫畫；（六）與國際學生交談，知道其他國家情況。
香港中產及富裕人家孩子，在家俾菲傭縱壞，完全唔識洗衫、洗廁所、洗浴缸，食飯就揀餸，唔合心水就唔食，父母都唔知點教至好。哈，一到咗外國，俾人哋（包括旅遊領隊）訂下生活規條，佢哋惟有一一遵守，唔食難以入口嘅英國食物，就會餓親，於是三個禮拜之內，改變行為，唔怪得呢類夏令活動，愈來愈多中學生參加。