亞視出身的姜皓文，皮膚黝黑，肌肉紮實而被喚作黑仔，事實上黑仔的事業和家庭絕不黑仔，反而一片光明，更跳出電視走入大銀幕，在杜琪峯執導、現正在港上映的《奪命金》中，扮演黑巿炒賣期指經紀，入型入格。脾氣暴躁的黑仔，坦言全靠賢內助金慧英為他撲熄怒火。
撰文：比華利

亞視雖然積弱，長期慣性低收視，但公仔箱中其實卧虎藏龍，《香港亂噏》扮嘢能手姜皓文，演技爐火純青，近年不少電影導演都喜歡選用這位綠葉王。黑仔近日在電影《奪命金》中角色搶鏡，他日前接受本報記者專訪，自爆跟老婆金慧英的閉門嘈交實錄。

「冇佢我會失方向」

黑仔94年在亞視邂逅落選亞姐金慧英譜出「黑金戀」，99年有指黑仔偷食陳梅馨斷正，黑金因而大打出手，不久二人和好並結婚收場，婚姻至今維持了12年。黑仔坦言感激老婆多年的包容，他說：「如果我冇咗佢，我會失晒方向，喺亞視冇乜好，最好就係畀咗個老婆我。」
夫妻共對12年，相等於4,000多天，二人無論多遷就忍讓，彼此總不會沒拗撬，黑仔直認與太太金慧英經常爭拗，但就算拗到火紅火綠，大家都共識從不提離婚，黑仔說：「大家可以講幾爛嘅粗口，但心照唔准講離婚兩個字，有啲嘢講咗真係收唔番。」
很多人年紀越大越收火，但黑仔不諱言自己剛相反，他說：「我自覺呢幾年脾氣越嚟越暴躁，郁啲少少嘢就好，好彩老婆忍得我，其實老婆未識我之前，佢性格都火爆，拍拖結婚後，佢竟然俾我馴服咗，有時又俾我撩番㷫，佢成日都話我使唔使咁歇斯底里。」火爆夫妻自有一套相處之道，金慧英擅於撲火，黑仔說：「可能最錫嘅人，我就最蝦佢，每次嘈交，老婆會好快彈開，大家冷靜吓，自然好快熄火，嗌交最忌唔好聽嘅說話衝口而出，想收都收唔番。」

童年坎坷學懂珍惜

黑金戀從爭拗中添了解，卻沒生兒育女的計劃，黑仔說：「養細路仔責任太大，我哋家屋企有三隻狗仔都好開心。」原來黑仔童年曾入住兒童院，其生父拋棄黑仔母子，母親帶着他改嫁，誕下三名同母異父弟妹，其後母親心臟病去世，繼父沒經濟能力照顧四名子女，遂送他到兒童院，童年坎坷，他說：「兒童院裏面學好學壞差一線，好彩我份人細膽先冇學壞。」童年未嘗家庭溫暖，黑仔與金慧英組織小家庭後，令他學會要好好珍惜。

凸眼龍死好彩

姜皓文在杜琪峯執導的電影《奪命金》中演活經營黑巿期指的「凸眼龍」，跟劉青雲飾演的蠱惑仔「三腳豹」有多幕對手戲，道盡人性貪念，凸眼龍最終更貪字得個貧，賠上性命。
黑仔向來欣賞杜Sir的作品，原來他於98年參演電影《真心英雄》曾爆出事，黑仔一臉尷尬說：「當年我面對大導同青雲，自己騰晒雞，當時場戲叫我落車開槍，我落車唔記得拉手掣，結果碌到武師隻腳，杜Sir面色一沉。」吸取經驗，黑仔這次在《奪》片再拍杜Sir和青雲，不再人如其名般黑仔，淡定得多，他還發揮得淋漓盡致，把貪得無厭的凸眼龍演得不慍不火，黑仔說：「我今次死好彩，撞到個好角色、好對手同好導演。」

煲雪茄頭暈

黑仔難忘戲中有一幕要狂煲雪茄，他說：「呢場戲我食咗最少四、五支雪茄，食到頭暈暈，成口苦味，拍完都戇居咗幾粒鐘。」黑仔雖戲癮大，卻不敢棄視從影，他說：「電視入屋唔可以斷，除非我喺電影界好巴閉。」