新世界深水灣超級豪宅香島道33號，噚日曝光，8號示範屋六千三呎，發展商話，裝修費成千萬。間屋連埋車房玄關共四層，豪到有室內私家𨋢。
工程尚未完成，不過示範屋外形已經整好，外牆用淺灰色花崗石，睇落似迷你城堡。
室內用料更加講究，地板由德國入口，主人房有五百呎，套廁有按摩浴缸，浴室鋪兩款雲石。廚房都唔弱，地板與牆身鋪雲石，重有紅酒櫃及中西式煮食爐。
香島道33號，海景都係重要賣點，所以客飯廳全部落地窗，表面似乎冇乜特別，但原來為咗保安，其實係防盜夾層玻璃，如果有人潛入碰到啲窗，連接警衞室嘅警鐘就會響，即時有人到場支援。
物業早前已經賣到每呎二萬幾，發展商話，𠵱家有兩枱客傾緊6、7號屋，出價都超過二萬蚊呎。

新地鴨脷洲買地
舊年樓市重好殘，市場話新地買咗蜆殼石油鴨脷洲油庫塊地，大家半信半疑。噚日終於證實，由子公司麗恩出面，用咗二億銀。
塊地十一萬呎，現行規劃作石油氣及石油製品轉運庫，相信新地要花好多工夫，至可以起住宅，閒閒地搞佢三五年，而且地積比最多五倍。
不過，新地有咁多地要搞，相信唔急。
重有，新地喺鴨脷洲，除咗賣緊嘅深灣軒，重有塊地喺南面，跟嘉里、百利保合作，傾緊改契與補地價。