上個禮拜四伏勝打開某份報紙，正想睇吓本地公司通告嘅時候，見到內頁連續7版用黑色印咗幾隻中文字，其中3版寫住「廣東科龍致意」，另外4版則寫住「南華集團致意」，驟眼望落去好似訃文咁，真係大吉利是。當日有啲記者朋友八到消息就通知伏勝，話嗰邊出現技術問題，原本嗰7版紙係用嚟登科龍（921）同南華集團（265）嘅業績，但係由於到截稿時重未收到兩間公司嘅原稿，結果惟有將嗰幾版改做致意版。
有啲口痕嘅朋友就話，兩間公司業績都咁差，搞到班小股東個個哭晒股喪，就算要改版都應該寫為「廣東科龍向各股東致歉」，同埋「南華集團向各股東致歉」，起碼有啲誠意。
翻查紀錄，原來兩間公司都係由安達信幫佢哋做核數，而今次科龍喺公布業績之後，班管理層即刻好高調咁質疑安達信過去做嘅財務報告，加埋美國嗰邊Enron事件重未完事，今次安達信真係有排煩。