「爸爸係澳博的靈魂人物，仲有好多嘢要向他學習。」
何超鳳接任澳博主席當日如是說。她加入集團做足四分一個世紀，賭王除了是老竇，更是老闆。

「冇No呢個字，爹哋叫你做就做；佢冇講出嚟，但你要不停爭取佢嘅同意去做事。」原來賭王從不明確指點教路，不會手把手教女兒如何營商、如何處事，No guideline is the guideline。「跟咗爹哋十幾廿年，做佢伙計，睇佢開會，同有可能合作的生意拍檔點相處，從而喺嗰度，睇到佢點樣處理事，點樣同人傾計。開頭係緊張啲，佢係比一般人更叻的人，你的老闆係好叻的人，你自然要打醒十二分精神。佢係爹哋，又係你老闆，變咗你唔會好直接咁講，係要有啲技巧，例如話：『爹哋，你啲意見好似有啲...』，咁講好啲，佢其實好聽人意見。」

何超鳳眼中，爸爸做生意最強是聰明、開通，與時俱進，「爹哋好聰明，個腦轉得好快，一講，佢就睇得明，同埋佢係不停咁接收緊新事物，同住社會節奏一齊去，將新生意加入自己版圖，有時仲超越後生仔。」受訪所在的米芝蓮餐廳Robuchon，當初亦是由賭王引入澳門。做伙計、做女兒，人人都想得到老闆和爸爸的認同讚賞，何超鳳何時第一次受到賭王激讚，答案係：冇！「未試過佢話：『你做得好好！』，冇，最多聽過，係佢同啲世叔伯講：『我個女都OK。』我諗呢句，已經係唔錯㗎喇！」賭王標準果然非常高。

至於她作為new big boss，怎樣的員工在她眼中才值100分，「我從來唔畀100分人，90分已經好高分喇。第一樣，最緊要勤力；第二樣，係真；第三樣，要永遠向前，去學新事物。第四樣，如果做錯事，有些事做得唔夠好，要去認，要去檢討，之後再去做好。」她強調進步比本質更重要，「一個人可以好高學歷，好聰明，但唔去用，唔接受新挑戰係冇用，我覺得呢啲quality先係最緊要。」

極少受訪的何超鳳，少有打開坐了20年的辦公室大門，這個處理秒秒鐘不只幾十萬上落地方，充滿愛和人情味，牆上掛住保良局學生畫的水彩畫，枱面放了可愛的Snoopy公仔。「係，我有啲童真，係好鍾意Snoopy，所有嘢，生日卡呀，佢哋都會送Snoopy。」背住無敵維港景坐，超鳳望住一幅幅的溫馨家庭相、賀卡工作，和賭王及姐妹一齊參加女童軍活動的照片、信德20年『老人獎狀』、還有，女兒嬰兒時期的BB相，「當時佢哋好細，一兩歲時，嗰時我要返工，好唔捨得。」

採訪：林妙萍
攝影：郭賢興
攝錄：林德雄、周樂恒

精選娛聞，喺晒《娛果》
http://fb.com/appledailyent