【獨家專訪】金義聖見港警不停打人 有感香港人好孤獨
蘋果日報 2019/09/20 06:00
金義聖
人氣韓片《屍殺列車》的53歲男星金義聖，一直都非常關心香港「反送中」運動，除了於社交網力撐港人外，他日前更親自來港，跟韓國MBC新聞節目《探查企劃Straight》攝製隊一齊踩入灣仔、金鐘、沙田、調景嶺等地，實地採訪香港的示威情況，並再度接受本報的訪問。
金義聖今次隨製作團隊低調訪港，不過周日他現身示威現場時，隨即被廣大香港市民認出，他亦有親民地跟大眾合照及握手。對於在香港如此受歡迎，金義聖受訪時都坦言感到驚訝：「好驚訝咁多人認到我、歡迎我、一齊合照，亦有多謝我嘅聲音。其實我做嘅都係好小事，只係keep住喺IG上載支持香港人嘅留言，但去到現場甚至有市民攬住我喊，我有種『因為外界都冇認真理解過香港現時發生咩事、冇努力將現況傳遞出去，香港人好孤獨，所以就算只係我小小嘅關注，都令香港市民好感動』嘅感覺。」被問到拍攝期間有否擔心自己的安全，金義聖稱訪港前一度擔心過，身邊朋友亦相當擔心，不過抵港後得到不少人的幫忙、受到很多人的歡迎，在沒有危險的情況下完成採訪。
金義聖的團隊不只周日上街拍攝，之後數日都有去到不同地方採訪不同人士，亦見到學生組成人鏈的場面，他表示：「原先只知道有呢場民主運動，僅抱住支持嘅心去為港人應援，但直接嚟到之後，親身感受到呢場運動對港人嘅重要性，以及港人對於擁有自由、民主強烈嘅希望。」團隊周日在示威現場拍攝期間，亦有目睹警方發射催淚彈、利用水炮車鎮壓的場面，金義聖稱：「其實大多數市民都好和平，但當然亦有站在前線嘅勇武派，我亦知道香港市民近月一直經歷嘅事，所以明白市民嘅憤怒，而當晚見到警方使用武力鎮壓、不停打人，我都覺得好嬲。」
被問到連日來外出採訪中，印象最深刻的對話或故事，金義聖坦言好多對話都令他感到難忘及感動：「問過好多人『點解會出嚟抗爭』，幾乎所有人嘅回答都係『我哋而家唔企出嚟，就100%會輸，雖然咁樣抗爭有可能會輸，但亦有可能會贏，所以一定要企出嚟。』因為抗爭已超過3個月，現時情況越發嚴峻，甚至有警民衝突，我採訪時有問佢咃會唔會覺得好攰、覺唔覺得有希望，有人話『唔係因為有希望先繼續堅持，而係堅持落去先有希望』，聽到呢句說話我都覺得好感動。我又從受訪議員口中得知，有一名主婦曾帶埋小朋友行到前線，令我感到驚訝，我先知道並非只有年輕學生企喺最前線抗爭。」
韓國早年亦有大規模示威活動，最為港人熟悉的就是改編為韓片《1987：逆權公民》的「六月民主運動」，事關當年情況跟香港現況十分相似。金義聖之前受訪時表示自己年輕時都曾上街抗爭：「其實當年仍然好細個，已經不太記得詳細內容，係上咗大學睇返啲片先有返印象。當年示威情況都好嚴重，有扔磚頭、汽油彈，警察亦有發射催淚彈，便衣警員亂打人等，不過已經過咗咁多年，現時嘅示威活動都發展到另一形態。」現時香港警民衝突情況十分嚴重，金義聖稱當年也一樣嚴重，不過現時韓國已禁止使用催淚彈、水炮車。
對於港警之前曾於一日內發射超過800枚催淚彈的做法，金義聖笑言以前韓國警方曾於日內發射逾千枚催淚彈：「催淚彈其實對人體相當有害，假如警方係協助市民和平遊行示威，根本唔會發生之後嘅衝突。但目前由我所見，香港警察並冇將市民視為佢哋應該保護嘅對象，反而視市民為敵人。市民發起遊行示威，警察好應該幫忙市民喺安全情況下進行，但現時警方並冇咁做，反而驅散、拘捕市民，我唔認為呢個係警方嘅職責。」提到催淚彈對人體有害，不過周日金義聖在現場時並沒有戴上「豬嘴」，被問到有否感到不適，他表示：「因為我都唔係行到最前線，同埋之後想行前時，前線人員就示意我因為冇豬嘴，阻止我唔好上前，不過因為催淚彈嘅煙向四處飄散，所以我都有咳同標眼水。」
近日香港媒體採訪示威現場時多次受到警方阻止，金義聖表示幸好團隊連日來採訪時沒有受到阻礙，不過亦有聽聞警方阻止傳媒拍攝、暴打示威者的事，被問到會否覺得香港的新聞自由正被打壓，他認為雖然表面看似正常，但其實市民無法自由地選擇能夠代表自己或香港的政客、議員或高官，是現時香港最大的問題。
目前「反送中」運動已持續3個月，被問到韓國國民有多了解是次抗爭運動，金義聖表示：「我相信好多人都聽過有呢個運動，但我估計深入了解嘅人唔多，其實我都係。好似之前特首林鄭話會撤回條例，我同樣有『咁所有事情都得到圓滿解決喇』嘅想法，不過近日外出採訪時，發現原來所有香港人都唔接受，而今次親自來港後，慢慢了解到香港市民到底想要啲咩，如果話香港市民之前抗爭係為咗阻止最壞嘅情況發生，而家佢哋係為咗有更好嘅未來而抗爭。」至於香港5年前曾進行的雨傘運動，金義聖受訪時亦稱：「當年有聽過呢個運動，不過當時冇太大關注。」
之前在韓港人亦有舉行集會撐香港，關注事態的金義聖亦有拍片支持，不過他表示因為忙於工作，未有直接參與當時的集會。對於美國《香港人權及民主法案》的看法，金義聖坦言假如通過的話，是對香港相當有意義的事，亦能夠對中國政府造成壓力，雖然目前抗爭運動可令外國得知現時香港的情況，不過他認為港人不應太依靠通過《人權法案》，港人的未來、自由、民主應由港人自己爭取。
金義聖作為首位韓國藝人公開撐港人，反而不少香港藝人因為大陸市場而噤聲，被問到會否覺得香港藝人沒有勇氣表達自己的意見，金義聖表示：「我唔覺係冇勇氣嘅表現，因為香港同中國咁近，假如直接公開表達自己嘅意見，可能會影響未來工作甚至會威脅到人身安全，其實韓國藝人都一樣。雖然目前大陸禁韓，但假如未來禁韓令解封後，我有份演出的電影、劇集都有可能被禁止輸出到中國，未來都有可能影響到我嘅工作，不過我一直保住『只為今日而活』嘅心態，應做嘅事就今日做，但我唔可以要求所有人都咁諗。雖然我理解香港藝人擔心啲咩，所以無法公開稱自己撐港人，但佢哋公開撐港警執法嘅行為，我就覺得有啲嬲。」由於金義聖公開撐港人，其IG持續受到中國網民留言攻擊，他表示目前仍有不少網軍留言，特別是他親身來港後變得更多，但他亦坦言沒有關注網軍的留言。
採訪：文康妮
攝影：沈健程
錄影：馮嘉銘
攝影：沈健程
錄影：馮嘉銘
金義聖大談訪港採訪的工作。（攝影：沈健程）
金義聖驚訝自己受到港人的歡迎。
金義聖日前跟製作團隊在街頭採訪。