河國榮今日擔任葵興一個寵物座談會嘉賓，分享過去17年收養13隻狗狗及照顧點滴。

河國榮家中現時仍有5隻狗狗，當中兩隻係年長17歲嘅老狗，佢哋都身患重病而未能自理小便，所以河國榮要每日三次抱起老狗們如廁，佢話：「由於每隻都重25公斤，抱起佢企直再按佢膀胱小便，要用好大腰力，唔小心就好易受傷。」因為屋企只有佢抱得起咁重嘅狗，所以佢將稍後返澳洲探親計劃取消，留港照顧。河國榮話照顧狗狗知識技巧係無師自通，累積經驗，礙於睇獸醫費用不菲，所以佢承認係好大負擔，但享受同佢哋相處嘅快樂時候，兩夫婦又決定，如家中狗狗離開後，會休息一段時間不收養，等將來再收養老狗。