【更新圖片】香港樓市炒得熱烘烘，雖然樓價已經上到癲價，但追上車、炒賣的人大有人在。著名對沖基金經理、中環資產投資行政總裁譚新強對港樓有一套獨特的看法，「啲人將成世積蓄擺咗落去，變咗做所謂嘅樓奴……你咁樣同鹹魚有咩分別呀？！」

投資樓市經驗豐富的譚新強，2003年SARS後活躍於香港樓市，另外亦有在內地、海外及澳門等地都有投資房地產，但近5年已不再買港樓。又有「金錢之王」之稱的譚新強表示，以買樓比喻買美圖（1357），指的是追買美圖的部分資金，除了有機會係莊家活動，亦有部分係為咗走資，而同時「香港樓市因為有啲唔係好正常嘅熱錢走入嚟，炒高咗啲地。」

港樓會唔會似美圖股價一樣，好快見頂急瀉幾成？他預期，樓市未來一年內未必會崩潰，可以仲升多少少，雖然息口開始上升，但供樓嘅人勉強節衣縮食都可以繼續供樓。不過，他指如果要買兩三萬蚊呎的納米樓，「我唔覺得咁樣係一個發達嘅方法，呢個係有一定嘅危險」，因為三年後美國息口繼續正常化，加多厘半、兩厘，再加埋要拆QE縮小聯儲局報表，中長線係一個明顯危險嘅投資。

譚新強又踢爆，一直被視為樓市三大真理，其實係歪理！首先，有人話中資高價搶地，地價已經咁貴，未來樓價應該會繼續升啦，麵包一定會貴過麵粉。他直斥樓市「麵粉麵包論」好老土、無意思，「做發展商一定羸梗架咩？發展商好多都會財困啦，倒閉架啦」。他意指，有中資發展商可能為走資，或唔介意一定的虧蝕。

譚新強炮轟第二大歪理，有人話「依家唔係睇買樓嘅負擔能力，睇投資者嘅負擔能力」，又係呃人嘅！他指，到最後都要講收益回報，如果息口一直上升，租金又追唔上，理論價值就一定跌。

第三大歪理係「話供樓平過租樓就一定應該買樓」！譚新強直指，睇落似係常理，其實係歪理。他指，租樓可以隨時走人，供樓就孭咗幾百萬債，「結果一係就唔開心，一係就破產都有機會，以前香港又唔係未試過負資產呀」，「我唔係話一定會發生，但要知道自己冒緊咩風險囉。」

譚新強認為，現時香港樓市的情況是，買大單位的話，港人總價負擔能力有限，所以地產商將啲樓愈切愈小，切到依家細到納米樓，就可以將個呎價推高，「亦都係製造一個假象令人覺得樓市不停上升，其實流通性就唔係咁高，好多其實係有價冇市嘅。」

掌握財經生活資訊，即Like「蘋果ATM」fb專頁啦！
http://fb.com/appledailyatm