上戶彩遭電話騷擾 驚到喊
日本偶像女星上戶彩憑住燦爛可愛嘅笑容成為日本少男殺手，不過喺鏡頭前經常笑面迎人嘅彩妹，上月中出席唱片宣傳活動時突然狂喊，雖然彩妹話係因為見到現場二千幾位fans，太過感動而喊咗出嚟，但其實彩妹當時正飽受電話騷擾，令佢精神極度緊張。
據知彩妹當時正趕拍劇集《排球女將》，加上要為新細碟宣傳，密密麻麻嘅工作已經令佢透唔過氣。喺呢個時候，彩妹嘅手提電話經常收到唔出聲、冇來電顯示嘅電話騷擾，就算佢拍劇時熄咗電話，留言信箱亦出現相同情況，令到彩妹變得非常神經質同唔開心。
而喺彩妹受到電話騷擾之前，曾經同合作過嘅男藝人一齊去卡拉OK，重俾對方出言性騷擾，之後重想追佢，令到彩妹不勝其煩。其實以往彩妹亦收過唔少fans嘅騷擾信，佢都一一啞忍，證明人氣偶像一啲都唔易做㗎。
彩妹所屬嘅事務所亦承認有人打電話騷擾，重令彩妹情緒唔係咁穩定，不過其後經理人大鬧對方一輪之後，就再冇接到呢啲騷擾電話，彩妹嘅情緒亦穩定番好多，各位fans唔使咁擔心啦！