成軍兩年︱MIRROR玩快問快答互爆私隱 姜濤最孤寒AK最易嬲

蘋果日報 2020/12/02 10:30

mirror姜濤tigeranson konganson lolokmanaltonfrankieianedanstanleyJerJeremy
    曾幾何時，香港年輕人對偶像的概念，只放眼韓國和大陸兩個盛產地，年輕偶像在香港幾近是天方夜譚。兩年前，ViuTV打着為年輕人追夢的口號，製作真人騷《Good Night Show全民造星》，結果賽果未揭盅，fans逼爆商場的畫面奇蹟地重現。「造星橋」出乎意料地成功，ViuTV食住個勢，選出12位成員宣佈成軍，造就男子組合MIRROR的誕生。
    兩年過去，當初憑着一股儍勁、半分青澀殺入娛樂圈的MIRROR成員，除了有單飛出歌，亦有入劇組拍劇，不過fans最期待的，始終是MIRROR 12子合體出專輯，幾經磨合及在fans熱切訴求下，MIRROR近日推出新歌《One and All》和入行以來首張專輯，碟內多首作品均表達出由戰友變兄弟的感情。隊長Lokman楊樂文說：「其實而家同初初最大分別嘅係默契，好似我哋12個，講嘅嘢會越嚟越似，亦好快會sense到大家諗緊咩。」Alton王智德亦笑說：「開頭大家客客氣氣，而家就話之你，有咩事就會推對方去死。」不過12子要齊腳宣傳亦非易事。MIRROR接受《蘋果》訪問當日，成員姜濤、Ian陳卓賢和Edan呂爵安便因拍劇缺席。
    兩年時間不算長也不算短，但在密集式相處下，MIRROR各成員的真性情或多或少浮現於人前。訪問當日，MIRROR 9子在快問快答形式下互揭私隱互篤背脊，結果AK江𤒹生以半票之微撼贏Anson Lo盧瀚霆，成為票王。

    最姿整？

    （Anson Lo得票最多）Anson Lo苦笑：「咁相對下我係囉，其實我唔姿整，只係識化妝啫！」AK亦有幫口：「咁最姿整嗰個都唔喺度，佢都係亞軍啫！」冠軍係邊個？呼之欲出啦！
    empty
    除姜濤外，Anson Lo被指是隊中最姿整一個。

    最八卦？

    （Frankie陳瑞輝得票最多）Frankie尷尬說：「可能係我成日問『乜事呀乜事呀？』佢哋咪覺得我八卦囉！」
    empty
    Frankie被指是最八卦一個。

    最抵得諗？

    （AK同Jeremy李駿傑平手）Lokman說：「AK最有義氣，所以佢一定最抵得諗，而Jeremy你叫佢做嘅嘢，如果唔犯法佢都會做。」Alton亦笑話：「犯法嘅可能佢都會做呀。」
    empty
    Jeremy最抵得諗，在美國受訓時，無論洗衫煮飯都有他份。

    最大方？

    （AK得票最多）Alton說：「佢（AK）好鍾意揸車，有時會湊夠腳車埋我哋，但佢唔會主動問我哋攞返停車場錢。」AK笑言：「兄弟嘅我冇乜所謂，咁當然係有限啦，無啦啦問我攞個首期嚟，我就梗係冇啦！」
    empty
    AK獲Lokman讚有義氣，其他隊員亦指他為人最大方。

    最孤寒？

    （全員投缺席的姜濤）Lokman笑說：「因為佢去外地拍嘢，我哋台前幕後咁多人，佢只買咗一盒咁大（用手比劃一張A4紙的size）嘅零食畀我哋咁多人分。（有冇當面投訴佢?）梗係有啦，佢咿咿哦哦咁就耍走咗！」此時AK（扮姜濤聲）說：「喺機場淨係得呢個，佢哋話最好食㗎！」Lokman補充話：「咁佢都係守財啫！」
    empty
    姜濤被公認是最孤寒一個。（資料圖片）

    最花心？

    （缺席的Ian陳卓賢得票最多）AK說：「唔一定講女仔嘅，Ian遇到好多選擇嘅時候，係會樣樣都想要。」
    empty
    Ian被公認為MIRROR最花心一個。（資料圖片）

    最識𠱁人？

    （Alton得票最多）Frankie解釋：「話說我哋一齊上drama堂，要做宅男，但導師話佢太識𠱁女仔，做唔到個效果。」AK：「一句講晒，佢係一個對女仔好有殺傷力嘅人，如果佢要出招……」Lokman接口說：「應該係殺人不見血！」Alton雖然認同，但話最難搞的女人就是自己媽咪。
    empty
    Alton被指把口啷過油，但他指最難𠱁就是媽咪。

    最易嬲？

    （全員投AK）Stanley邱士縉篤完AK卻幫兄弟解圍：「可能佢急啩！」AK：「我比較有原則啫，我好堅守我嘅原則！一嬲會唔出聲，摒埋一邊！」Lokman指要𠱁AK其實頗有難度：「逐個逐個囉，呢個唔得呀，到第二個囉，或者咁等佢靜吓先啦！」AK承認：「大多數都係Lokman先𠱁到我。」Lokman接口：「都係『哦』佢囉，唔知佢嬲乜嘛，同佢講一陣先嬲好冇呀？」AK：「其實最長都係1、2個鐘度，之後自動自覺又開心返，我最好嘅就係一個快嚟快去嘅人嚟。」
    empty
    AK自認最易嬲，但他同時指自己是快來快去的人。

    最搞笑？

    （Tiger邱傲然得票最多）AK說：「因為Tiger係我哋入面年紀最細嘅小朋友，但係住喺佢內心入面嘅，係個40幾50歲嘅老靈魂，有時佢唔係好講嘢，但佢一講嘢就語出驚人咁，令到我哋大家都好開心。」
    empty
    隊中年紀最小的Tiger，只說了幾句話已令隊員捧腹大笑，他被指是MIRROR最搞笑的成員。

    最多女仔鍾意？

    （Anson Lo得票最多）Lokman：「我有2萬fans，你有3萬fans，點計都係你多啲。」Anson Lo：「嘩，你哋都咁計數字啦，咁冇得唔認啦！」
    empty
    Anson Lo獲成員公認是最受女fans歡迎。

    姜濤打機變另一個人

    眾人七嘴八舌越講越起勁，再爆不在場的姜濤、Edan呂爵安和Ian的秘密。AK說：「姜濤係一個好勝心好強嘅男仔，去到美國集訓開頭唔係咁熟，但打機就會見到佢另一面，佢會忽然小朋友上身咁，贏咗會叫囂：『Yeah! Who’s the best? Who’s the best?』你平時見到佢係一個好謙虛嘅人，打機嗰陣佢會變咗另一個人。」Stanley亦話：「佢成日唔記得嘢，有健忘症。仲有唔好畀佢見到任何反射嘅嘢，包括眼鏡、電話、手錶，連對眼都唔好畀佢望到，佢會對住啲反光嘅嘢執佢前面嗰條頭髮，如果趕時間就大鑊。」AK亦話Ian雖然是排球運動健將，但原來他是怕水的，因此對於任何水上運動都只能遠觀而不能參與其中。「聽過好似話佢細個嗰陣，同阿哥玩水浸親，自此之後就好驚水，我哋早排玩wakeboard佢都唔肯玩。」
    至於Edan，眾人憶起在美國集訓時，對方發生的一件「大」事，起哄逼較內斂的Jeremy爆Edan大鑊，Jeremy帶點不情願說：「又講呀？唉，美國訓練嗰時，佢有朝早開大，塞住咗，搞唔掂，之後我幫佢搞掂咗。就係咁啦，呢件事講足兩年。可能佢平時生活上俾媽咪照顧得好好，自我照顧能力比較澩嫪（撈攪）。」AK亦說：「嗰陣我哋大家都冇執床，因為太攰關係，不過Edan張床係特別亂，永遠都有啲衫呀、底褲呀喺晒張床上面。」
    採訪：王梓嫚
    攝影：陳慧安
    攝錄：廖達燊、林賓尼
    服裝：Diesel
    化妝 ：Rainbow & Giann @Annie G.Chan Makeup Centre
    髮型 ：Lydia Yung、Man Chan、Leo Fan @ Chic Private I Salon
    empty
    MIRROR出道兩年，兄弟間由初初客客氣氣到現時互爆私隱，言談間可看出他們越見熟絡。
    empty
    MIRROR受訪當日，姜濤雖然不在場，但到互爆私隱時，隊員都會諗起他的真性情。
    empty
    MIRROR成軍兩年，近日推出新歌和首張專輯紀念成員間的兄弟情。
    empty
    最終AK獲兩票半成為票王。
    empty
    Lokman楊樂文
    empty
    Anson Lo盧瀚霆
    empty
    Jeremy李駿傑
    empty
    AK江熚生
    empty
    Stanley邱士縉
    empty
    Alton王智德
    empty
    Frankie陳瑞輝
    empty
    Tiger邱傲然
    empty
    Jer柳應廷
    empty
    MIRROR成軍兩年，成員間越來越有默契。
    empty
    正在播映的《男排女將》有多位MIRROR成員演出。
    empty
    唔講唔知，身為男排運動健將的Ian，原來勁怕水。
    empty
    姜濤近日出新歌又到台灣拍劇，工作不斷。
    ----------------------------
    《蘋果》英文版免費試睇：了解更多
    英文版已登錄《蘋果》App，立即下載/ 更新：iOS / Android
    -----------------------------
    支持蘋果深度報道，深入社區，踢爆權貴，即Like蘋果專題及調查組FB專頁！