當年今日

飲食人誌:
元朗新派日本菜口味多變取勝

蘋果日報 2004/05/19 00:00


元朗區近年新食肆愈開愈多,單是日本料理原來也有二十多間,但新店主理人阿民同表姐李小姐卻專誠來這兒創業,皆因睇中元朗區的消費力,李小姐更表示:「雖然日本料理喺元朗區好似雨後春笋,但其實仍然有發揮空間,好多客人都覺得我哋呢度勝在花款夠多變化,就算大舖都未必有我哋咁齊。」

記者:陳淑君 攝影:梁翠妍
主理人阿民今年27歲,入行做日本菜已有8年時間,「我細細個就負責整食物畀妹妹食,17歲嗰年家姐帶我去食日本菜,因為覺得菜式幾靚幾得意,所以走去日本料理店應徵,但喺日本人公司工作期間,發覺就算有好提議,最終都係由老闆話晒事,自己只能夠按簡單公式去做,覺得好悶。多得表姐鼓勵同支持,所以就試吓自己開舖。」
表姐夾錢創業
表姐李小姐可以說是阿民的伯樂:「我幾欣賞阿民嘅功夫,佢肯研究日本菜,對味覺要求高,又肯周圍試菜,做得好有心機,事事都肯親力親為,我知道佢只係欠少許資金,所以就夾錢一齊做。我以前都試過搞拉麵店,但花款唔夠多,亦發覺有啲年紀較大嘅師傅,真係唔大願意試新嘢,後生仔就比較積極同有創意。」確實,店裏掌廚的人,阿民年紀已算最大,其餘都是二十來歲年輕人;而樓面的侍應,一樣是清一色美少女。
empty
■阿民認為,創業才能做到自己喜愛的料理。
empty
■李小姐支持表弟創業,亦很欣賞他的廚藝及處事作風。
壽司蛋糕$130
凡有四位以上光顧而其中一人是壽星仔的話,只要展示身份證作證明,就可以免費食到壽司蛋糕,若是散叫,則要$130。直徑達20厘米的蛋糕,份量絕不輕,面層有蛋皮、三文魚子、三文魚及奇異果,壽司飯為主的餡可分作兩層,上層是蟹子、吞拿魚沙律,酸酸甜甜;下層則是紫菜粉,稍嫌簡單。
empty
金砂帶子炒意粉$42
金砂原來是指蟹子,據說李小姐在一次日本旅行時試過某個品牌的意粉,覺得尤其爽滑彈口,便專誠從東京訂貨回來做這個意粉,意粉是接到order才淥,以免變腍;帶子刺身肉厚鮮甜,混着蟹子吃起來,頗有口感,由於意粉主要以蒜茸粉及紫菜粉調味,故較香口,也不會太膩滯。
empty
炸蝦火龍卷$38
以兩至三隻大頭蝦做天婦羅,再包成壽司模樣,面層撒上蟹子及炒香的紫菜粉,賣相搶眼,酥香爽實的蝦肉要趁熱吃,否則會給壽司飯焗腍變韌。
empty
秋刀魚卷$28
將秋刀魚中間正骨起出,放上金菇及日本魚蛋卷來炸,勝在惹味香口,但秋刀魚本身多細骨,食得未夠暢快。
empty
日式薯仔沙律$25/火龍果沙律$22
薯仔沙律內是薯茸、甘笋粒、青瓜粒、碎蛋及沙律醬,材料簡單但香滑;若想食生果原味,則可揀火龍果沙律,內有火龍果、薯仔粒、青瓜及菠蘿粒。
empty
豚肉煮$30/$40(定食)
以清酒及味醂等燜足幾小時的新鮮五花腩,味道幾似上海紅燒肉,建議蘸英式芥辣食,如滷水汁般的醬汁,則最適合用來送飯。
empty
美少女侍應Cherry
「我做飲食方面嘅侍應都有三年,呢度由開舖就做,好有歸屬感,因為老闆唔會擺老細款,大家都好親切。做日本菜侍應要比較細心,喺度又可以同客傾偈,溝通一下,做過多間食肆最鍾意就係呢度。」
empty
食客兩句
高小姐
「經常幫襯,覺得呢度價錢適中,服務態度好,個人鍾意食壽司同拉麵,呢度亦有唔少特飲,選擇幾多,珍珠奶茶都有。」
empty
熊谷木日本料理
地址:元朗擊壤路13-17號順發大廈C舖(元朗廣場巴士總站附近)
電話:24796123
營業時間:11:30am-4:00pm及5:30pm-10:30pm
座位:38個
交通:巴士54、64K、68M、76K、77K、277、968
empty