當年今日

紅魔賤賣約基畀布力般
夏日求驗客:黑雙煞故劍重逄

蘋果日報 2002/07/27 00:00


曾經令唔少後衞聞風喪膽嘅黑雙煞組合,終於重現球壇啦!不過就唔係喺曼聯,而係喺布力般。
曼聯禮拜五同意以超級至抵價嘅二百萬鎊,將九八年用一千二百六十萬鎊買返嚟嘅約基,買畀布力般。由於高爾上屆已過檔布力般,𠵱家連約基都嚟埋,咁即係話,當年幫曼聯成為三冠王嘅黑雙煞,終於重現球迷眼前。
但係,係人都知約基經已跌晒Watt,上屆喺曼聯連冷板都冇得坐,所以佢就算可以同高爾故劍重逢,威力重有冇以前咁勁,就要睇領隊桑拿士嘅功力。雖然係咁,話晒佢兩個以前一直都係合作幫曼聯打其他球隊,不過𠵱家就掉轉槍頭,幫布力般打曼聯,所以第日有機會對番舊僱主,你都咪話唔有趣!

世界難撈施丹自願減薪
世界球壇受到經濟差大氣候影響,有關啲球會財困同球員減薪消息無日無之。繼國際米蘭嘅韋利同朗拿度之後,最新消息話皇家馬德里嘅法國球星施丹都自願減薪,幫補吓球會。唉,連球王都咁做,其他球員想唔跟都難。

英運會搵碧咸充撐場面
英聯邦運動會響世界體壇唔算好大盛事,號召力唔強,所以大會除咗搵傑斯同皮亞斯做火炬傳送員之外,重搵埋萬人迷碧咸撐場。由於事先唔係太多人知碧咸會出現,所以引起哄動。曼市最出名足球,搵冇份參加運動會嘅球星撐場,起碼引起多啲人注意啦。

羅馬里奧讀時裝設計謀後路
巴西憑「3R」威力勇奪世界盃,應該無咩人會再記得羅馬里奧,呢位過氣球星似乎亦知球壇已經唔係佢天下,最近報讀番停學兩年嘅時裝設計課程,開始謀定後路。不過我求大俠睇佢平時衣着品味……,要加倍努力至得囉。