繼特首夫人鮑笑薇打頭陣後，終於輪到煲呔出場，港府噚日宣佈特首今個星期五起，到四川災區訪問三日，同四川省有關部委商討特區參與災區重建工作嘅機制同相關安排。
曾太早前已隨紅十字會去過災區探訪，有太太畀第一手資料，相信煲呔應該掌握一定災情。港府呢個考察團陣容鼎盛，包括政制及內地事務局局長林瑞麟、發展局局長林鄭月娥、特首辦主任陳德霖、政制及內地事務局常任秘書長羅智光及發展局常任秘書長麥齊光。
出動咁多局長，相信唔會得個睇字，據講港府或會設立一個機制，長期跟進協助災區重建工作，甚至可派出專業人士幫手。煲呔老友寶哥哥巧合地喺聽日立法會提問呢個問題，八方相信好快就公佈具體內容。