金融服務界選委「票王」詹劍崙（Ricky）似乎越嚟越敢言，亦有潮州怒漢本色。噚日佢喺facebook po文，為「架己冷」解畫，指怒漢其實係好東西，希望1,200名選委都可以做擇善固執、有情有義嘅怒漢，連十優港姐麥明詩都有留Comment，畀隻手指公佢㖭呀。
金融服務界中，只得Ricky同徐聯安唔跟大隊，走去提名薯片叔叔參選特首，大家都對二人加晒分。不過Ricky其實一向有話直說。

「有人向中央盡公民責任」

Ricky同華華講，自己呢啲潮州人成日被人標籤做潮州怒漢，但佢覺得怒漢只係講嘢大聲啲箒，1,200名選委其實應該做千二怒漢，擇善固執、充滿熱情、有情有義、盡公民責任，有人選擇「向中央盡公民責任」，咁就冇計喇。
Ricky深信，如果特首係個似樣嘅人，香港人就會做番似樣嘅事，「如果你吓吓講大話又唔認，講一套做一套，咁人哋點信服？」
對術數素有研究嘅Ricky話，自己唔敢算選舉結果，但就提到舊年佢同張華峰、徐聯安參選立法會，編號同得票一樣順住落（張華峰1號，得票最多，2號詹劍崙、3號徐聯安依次遞減），唔知今次特首選舉又係3個人，結果會否相同呢？3位參選人日前抽咗籤，薯片1號、林鄭2號、胡官3號。

李華華
mailto:[email protected]