長和（001）、和黃（013）世紀重組進入最後階段，「超人」李嘉誠自1979年入主嘅和黃仲有4個交易日就拜拜，如果大家想買和黃實物股票做紀念，今日就係買股嘅最後機會，事關買股後，仲要提倉同拎去中央證券轉名，先可以擁有自己名嘅和黃實物股票㗎。
和黃約有1萬名實物股東，聽中央證券登記董事總經理鍾絳虹所講，長和與和黃今年初宣佈重組後，實物股東嘅數目至今冇乜大變。但最近就有人問，點樣可以攞實物股票留念。

只作留念　無投資價值

長和與和黃重組合併，下周二（26日）就係和黃嘅最後交易日，中央證券將於6月2日向和黃股東寄出長和股票，以後唔會再發和黃實物股票。
鍾絳虹話，如果大家想攞和黃實物股票留念，最遲要喺本月28日拎股票去中央證券轉名，仲要辦3日特快手續，趕喺6月2日前收股票，否則，一般需時10日先有股票攞，到時已經係長和，唔係和黃股票。
不過又咁講，和黃嘅實物股票可能只得留念之用，未必有投資價值。金輝錢幣郵票老闆陳榮輝都話，咁多年來都冇乜人將絕版實物股票，當郵票、紙幣咁投資。
咁又係喎，實物股票又稱牆紙，以往除牌嘅上市公司，一係被大股東私有化，但多數都係衰到冇朋友嘅公司，股民買咗呢類輸到渣都冇嘅股票，咪話拎股票返歸貼牆紙囉，的確係好難想儲起，不過和黃呢隻咁有歷史，仲係超人曾經擁有嘅股票，華華就決定儲些少留念嘞。

長實地產≠長地？

講開呢單重組，長和與和黃合併後，將以介紹形式分拆長江實業地產（1113）喺6月3日上市，長地噚日出通告，話佢哋中文股份簡稱係「長實地產」，而非長地，但市場已經叫慣長地喎。

李華華
mailto:[email protected]