李家鼎最近為搞私房菜忙到冇得抖，早前細孖李泳豪，相隔16年後再做主角嘅電影《極鬪5之雙殺》舉行首映，佢都嚟唔到支持。(相關新聞﹕ http://bit.ly/2xD63R5 )今晚喺九龍灣Mega Box戲院再做宣傳，鼎爺話幾忙都要抽空去。

鼎爺話﹕「私房菜忙到PK呀，飯都未食，但都一定要嚟支持。後生仔要多啲機會，我間私房菜準備3號開張，已經Book到明年1月，多謝大家支持。」佢透露私房菜共有七間房，全部都有玻璃可以睇住鼎爺煮餸，問會唔會着得靚仔啲？佢笑笑口話﹕「唔着最靚仔，公司好好，送咗一套廚師服畀我煮嘢食。」泳豪就話聽日都要落舖幫爸爸試菜，講番部戲，泳豪話希望阿爸睇完滿意﹕「佢應該對動作場面好執著。」

另外，楊明亦有到場支持，對於被讀者影到同女友一齊睇樓，佢話間屋雖然係對海，但間隔麻麻地，所以仲要睇。問係咪plan結婚？佢話﹕「需要啲時間，住吓先，佢屋企人都好開通，食過幾次飯，佢哋都好放心將個女交畀我，我覺得佢哋對我印象幾好。」思明話唔寄望楊明會幫手做家務，楊明笑笑口話﹕「應該大家一齊做，邊個得咪邊個做囉，但我日日返工，睇邊個得閒啦，吓。」佢話唔擔心同居會有磨擦，最重要係大家好好溝通。