今日2018年最後一日，韓國演藝圈認真喜事連連。

繼韓國綜藝節目《Running Man》嘅33歲成員李光洙認戀女星李善彬後，《RM》嘅39歲男星HaHa亦都宣佈再做老竇，HaHa同歌手老婆星結婚六年依然恩愛，星分別於2013年7月誕下長子，去年3月誕下次子，而今日HaHa方面透過事務所公開老婆懷孕十周喜訊，由於仍屬懷孕初期，所以兩夫婦都好低調，亦冇特別向朋友透露喜訊，只得家人同埋事務所嘅人先知道。

另外，喺噚日舉行嘅《MBC演技大賞》上，憑《我的愛情治癒記》奪得連續劇部門男子最優秀演技獎嘅40歲延政勳，獲獎後就自爆36歲演員老婆韓佳人再度懷孕喜訊，延政勳獲獎後就興奮表示未來屋企將迎接新嘅成員，同時亦希望寶寶健康幸福地成長。到今日韓佳人所屬事務所亦透露韓佳人現時已懷孕20周，預產期喺明年5月。

韓佳人同延政動於2005年結婚，曾經歷小產之痛。前年4月韓佳人平安誕下女兒。

精選韓流，喺晒《娛果》
http://fb.com/appledailyent