呢晚方嘉柏原本好靜，就算潘頓咁旺，早段場次幫方嘉柏騎熱門「手機皇」同「光速銀桂」都係冇表現。不過潘頓始終係方廐頭號殺手，騎練第六場終於出擊得手，順利憑大熱「方程式」捧走全晚唯一錦標五陵會盃，另外尾場合作贏「城中話題」，潘頓全晚憑「一定贏」、「好老友」、「方程式」同「城中話題」食出大四喜，其中兩隻係全熱門。「方程式」上場用何澤堯跑田草千四，熱門搏輸咗只得第三，今次搵番潘頓出馬，留前鬥後建功，女馬主李麗雯第一次養馬兼首次建功，即贏錦標賽，方嘉柏近四次谷草夜賽都有馬贏，谷中虎即係谷中虎！
提提大家近三次谷戰，各有一駒上仗於田草入位，再出轉跑谷草即贏馬補中，順序係「金磚五國」、「準備就緒」及「方程式」，而近三匹方廐沙田轉谷草用潘頓的馬，更悉數勝出，分別係「薑餅人」、「準備就緒」及「方程式」。