劉愷威同楊冪日前喺冬至突然發聲明宣佈離婚（新聞連結： https://bit.ly/2V6szh3 ），劉愷威爸爸劉丹今日喺電視城開工時回應囝囝離婚一事，丹爺表示：「兩個（劉愷威與楊冪）都好好，兩個都冇事，大家放心。」問到佢幾時知道呢件事，丹爺遲疑一陣表示：「嗯……我都唔係好清楚㗎咋，就知道話係決定咗喇，咁梗係尊重佢哋嘅意見啦！」至於孫女小糯米係咪繼續由丹爺照顧？佢話：「孫女都冇事，總之一切照常，完全冇問題，大家放心。」

問到劉愷威離婚前有冇同家人商量過，丹爺表示：「呢啲嘢佢哋自己決定得㗎喇，我哋都尊重佢嘅意見，佢哋咁做一定有佢哋嘅原因，咪尊重佢哋嘅意見囉，總之一切安好，勿念勿念，多謝多謝。」咁二人之間係咪如外界揣測有第三者？丹爺話：「哈哈，好多人都係咁講，總之佢哋兩個都好好，兩個都冇事，係咁多嘢喇，拜拜。」

精選娛聞，喺晒《娛果》
http://fb.com/appledailyent